ԵՐԵՎԱՆ, 11 հունիսի — Sputnik. Մերձմոսկովյան Կրատով գյուղի բնակիչը շաբաթ երեկոյան փակվել է սեփական տանը և կրակ բացել պատուհանից պատահական անցորդների ուղղությամբ, այնուհետև մի քանի ժամ շարունակ պայքարել էր ուժային կառույցների դեմ և նրանց վրա գցել անտառում գտած նռնակները:
Կեսգիշերից հետո «հրաձիգին» վնասազերծեցին, նրա գործողությունների զոհ դարձավ չորդ մարդ, ևս երկուսը հոսպիտալացվեցին: ՆԳՆ ղեկավարը հայտնեց, որ հատուկ ծառայությունների չորս աշխատակիցներ հակազդման ժամանակ թեթև վիրավորվել են, հայտնում է ՌԻԱ Նովոստին:
Հրաձիգը նռնակ ուներ
Դեպքի վայր ժամանեցին ոստիկանները, Ռոսգվարդիայի մարտիկները, բժիշկների բրիգադներ և քննիչներ: Իրավապահ մարմինները շղթայեցին դեպքի վայրն ու սկսեցին գրոհը: Սակայն իրավիճակը բարդացավ, քանի որ «հրաձիգը» զինված էր նռնակներով:
Իրավապահ մարմինների և «հրաձգի» բախման ժամանակ բռնկվեց հանցագործի տան տանիքը: Մեկ ժամ անց կրակը տարածվել էր տան ողջ մակերեսով, ևս մեկ ժամ հետո տունն ամբողջությամբ այրվեց:
Տղամարդը, որն, ինչպես ենթադրվում է, կրակ էր բացել, մարտական փորձ ուներ: Դատվածություն, սակայն, նա չուներ:
Ռոսգվարդիայի մարտիկները գրոհ էին պատրաստում, սակայն հանցագործին հաջողվեց դուրս պրծնել շրջապատված շենքից և թաքնվել անտառում: Ավելի ուշ հնարավոր դարձավ պարզել նրա գտնվելու վայրը, և հատուկ գործողությունների արդյունքում նրան վնասազերծեցին:
Հարևանները նրան հանգիստ մարդ էին համարում
Քննիչները քրեական գործ հարուցեցին 3 հոդվածներով. զենքի ապօրինի շրջանառություն (222), երկու և ավելի անձանց սպանություն (105 մաս 2) և ոտնձգություն իրավապահ մարմինների կյանքի նկատմամբ (317):
«Հետաքննությունը գնահատական կտա հանցագործի գործողություններին և կպարզի բոլոր արարքի դրդապատճառները», — ասել է ՆԳՆ ղեկավարը:
Մոսկովյան շրջանի դատախազությունը հայտնել է, որ հատուկ վերահսկողության տակ է պահում այդ գործը:
Կրատովի «հրաձգի» հարևանները չեն հասկանում, թե ինչը կարող էր պատճառ դառնալ նման գործողությունների համար:
«Նա հանգիստ մարդ էր, ոչ երեխաներ ուներ, ոչ ոք չուներ: Մոր հետ էր բնակվում, մայրը, կարծես թե, անկողնային հիվանդ էր: Մեկուսացված տղամարդ էր, անձամբ նրան չեմ ճանաչել, մի քանի անգամ տեսել եմ և վերջ»,- ասաց հարևաններից մեկը:
Նրա գործողությունների պատճառները հասկանալի չեն: Շրջանի իրավապահ մարմինների աղբյուրները ՌԻԱ Նովոստիին հայտնել են, որ «հրաձիգը» ԱԻՆ նախկին աշխատակից է:
«Անունը Իգոր Զենկով է, նա ԱԻՆ նախկին աշխատակից է»,- ասել է գործակալության զրուցակիցը:
Հայրենական մեծ պատերազմի տարիների զենք
Նախնական տվյալների համաձայն՝ «Կրատովի հրաձիգը» Հայրենական մեծ պատերազմի տարիների զենք է կիրառել: Զենքը պաշտոնապես գրանցված չի եղել:
Նռնակները, որոնք օգտագործել է «հրաձիգը», պաշպանական չէին, այլ հարձակողական և նույնպես Հայրենական մեծ պատերազմի տարիների, հայտնել են ՆԳՆ-ից:
