ԵՐԵՎԱՆ, 4 հունիսի — Sputnik. Ֆուտբոլի Հայաստանի ազգային հավաքականը սեփական հարկի տակ ընկերական խաղում բացահայտ առավելություն դրսևորեց Սենտ Քիթսի ու Նևիսի ընտրանու նկատմամբ՝ ջախջախելով մրցակցին բոլոր առումներով:
Հանդիպման ելքը վճռվեց արդեն առաջին խաղակեսում, որի ընթացքում մեր թիմը երեք անպատասխան գնդակ ուղարկեց մրցակցի դարպասը: Իսկ ընդմիջումից հետո մեր թիմը զարգացրեց հաջողությունը ու հաղթանակի հասավ 5:0 հաշվով:
Խաղի մեկնարկը մեր թիմի համար այնքան էլ համոզիչ չէր: Ինչ որ տեղ մեր տղաների գործողություններում ինքնավստահություն կար: Բայց դա տևեց մոտ տասը րոպե, որից հետո արդեն հավաքականն, արագություն դրսևորելով, սկսեց լրջորեն անհանգստացնել հյուրերին:
Սենտ Քիթսի ու Նևիսի թիմի համար մղձավանջը սկսվեց խաղի 20-րդ րոպեին: Արտակ Գրիգորյանն անհատական անցումով, սլալոմիստի նման անցավ մրցակցի պաշտպանության կենտրոնով ու գնդակն ուղարկեց Ռուսլան Կորյանին: Վերջինիս մնում էր գրավել անպաշտպան մնացած դարպասը: Ընդ որում, Ռուսլան Կորյանը խփեց իր առաջին գնդակը Հայաստանի հավաքականի կազմում:
Իսկ հետո, մինչև ընդմիջում, իրեն հերթական անգամ հիանալի դրսևորեց մեր հավաքականի առաջատարը՝ Հենրիխ Մխիթարյանը: Սրնթաց անցումով Մխիթարյանը մոտեցավ մրցակցի տուգանային հրապարակին, պատ խաղարկեց Կորյանի հետ ու նուրբ հարվածով կրկնապատկեց մեր առավելությունը: Մինչև ընդմիջում Մխիթարյանը ևս մեկ անգամ աչքի ընկավ՝ եզրափակելով Գագիկ Դաղբաշյանի եզրային փոխանցումը:
Այսպիսով խաղի ելքը պարզ էր, բայց հաշիվը՝ ոչ: Ինչպես և սպասվում էր Սենթ Քիթսի և Նևիսի հավաքականը ոչինչ չէր կարողանում անել մեր թիմի հետ խաղում: Արդյունքում՝ Արսեն Բեգլարյանը շատ դեպքերում խաղին պարզապես հետևում էր առանց որևէ լարվածության:
Ընդմիջամ ժամանակ և երկրորդ կեսում Արթուր Պետրոսյանը մի քանի փոփոխություններ կատարեց, ու հանգստանալու հնարավորություն ստացավ Հենրիխ Մխիթարյանը: Բայց մեր թիմի առավելությունը միևնույնն է շոշափելի էր: Արթուր Սարկիսովն ու Արտակ Եդիգարյանը վերջակետ դրեցին այս խաղին՝ խոշոր՝ 5:0 հաշվով հաղթանակ ապահովելով մեր թիմին:
Չնայած վստահ ու խոշոր հաշվով հաղթանակին, այս հանդիպումը ոչ մի կերպ չի կարելի համեմատել Չեռնոգորիայի հետ սպասվող խաղի հետ: Մրցակիցն անհամեմատ ավելի ուժեղ է լինելու, բացի այդ, չմոռանանք, որ խաղալու են հակառակորդի հարկի տակ: Իհարկե, եթե մեր թիմը կարողանար ներկայանալ Պոդգորիցա իր մարտական կազմով, այլ խաղ կստացվեր: Բայց դե այս կազմն էլ կարող է հասնել ցանկալիին:
Սենտ Քիթսի և Նևիսի խաղը մեր հավաքականի գլխավոր մարզիչ Արթուր Պետրոսյանի համար նախ և առաջ առաջիկա խաղի համար կազմի ընտրության հնարավորություն էր: Թե ինչ հետևություններ արեց մարզիչը, դեռևս հայտնի չէ: Չեռնոգորիայի հավաքականի հետ խաղին մնում է վեց օր: Եվ այդ օրերի ընթացքում պարզ է, որ մարզիչները արդեն իրենց տրամադրության տակ գտնվող խաղացողների մեջ վերջնական ընտրություն կկատարեն:
