ԵՐԵՎԱՆ, 4 հունիսի — Sputnik, Խաչիկ Չախոյան. Իսպանական թիմը խաղի ելքը վճռեց երկրորդ խաղակեսում, որի ընթացքում Կազեմիրոյի, Ռոնալդույի և Ասենսիոյի խփած գնդակները ապահովեցին արքայական թիմի հաղթանակը իտալական «Յուվենթուսի» նկատմամբ՝ 4:1 հաշվով:
Չեմպիոնների լիգայի 1997-98 թվականների խաղարկությունում «Ռեալը» նվազագույն՝1:0 հաշվով հաղթել էր «Յուվենտուսին»: Բայց այդ խաղը միայն հիշողություն էր Քարդիֆում եզրափակչին մասնակցած թիմերի համար: Մինչև եզրափակիչը «Յուվենթուսը» հիանալի ֆուտբոլ էր ցուցադրում ու մինչև եզրափակիչ իտալական թիմն ընդամենը երեք գնդակ էր բաց թողել:
«Ռեալը» ևս մեկ անգամ ապացուցեց, որ աշխարհի լավագույն ակումբներից մեկն է համարվում ու իտալացիների դարպասում հայտնվեց այնքան գնդակ, որքան մինչև եզրափակիչը թիմը բաց չէր թողնել: Իսպանական թիմը մրցակցին գերազանցեց ընդմիջումից հետո: Իսկ առաջին 45 րոպեի ընթացքում ոչ ոք չէր կարող ասել, որ «Ռեալը» նման առավելություն կունենա հանգստանալուց հետո:
Առաջին կեսի վիճակագրությունը առավելություն էր տալիս «Յուվենթուսին»: Սերուցքայինները միայն գնդակին էին ավելին տիրել: Մյուս գործոններով առավելությունը «Ծեր սինյորայի» կողմն էր: Բայց «Ռեալը» երկրորդ կեսում պարզապես շշմեցրեց նախ մրցակցին, ապա նաև «Յուվեյի» երկրպագուներին: Մինչև Կազեմիրոյի խփած գնդակը «Ռեալը» պարզապես սեղմել էր մրցակցին Բուֆոնի դարպասին: Ու գոլը հասունանում էր:
Ճիշտ է, Զիդանի թիմին խփած գնդակների ժամանակ օգնեց անդրադարձը, բայց բախտը ժպտում է ուժեղներին: Երկրորդ անգամ հաշվի մեջ առաջ անցնելուց հետո, Մոդրիչն ուղղակի ստեղծեց երրորդ գոլը, որի հեղինակը դարձավ Քրիշտիանու Ռոնալդուն: Ընդ որում, պորտուգալացին երրորդ անգամ եզրափակիչներում դարձավ գոլի հեղինակ (2008,2014 և 2017): Միևնույն ժամանակ, Քրիշտիանուն դարձավ այս խաղարկության ռմբարկուն 12 գնդակով և Չեմպիոնների լիգայում իր խփած գնդակների թիվը հասցրեց 105-ի:
Երկու գնդակի տարբերությամբ պարտվելիս «Յուվենթուսն» արդեն հոգեբանական խնդիրներ ունեցավ, ինչն էլ արտահայտվեց Կուադրադոյի մոտ: Փոխարինման դուրս եկած ֆուտբոլիստը շատ արագ երկու դեղին քարտ ստացավ ու հեռացվեց խաղադաշտից: Ջանլուիջի Բուֆոնը չկարողացավ գերազանցել Պաուլո Մալդինիի ռեկորդը: Հաղթանակի դեպքում Բուֆոնը կդառնար Չեմպիոնների լիգան հաղթող ամենատարեց ֆուտբոլիստը: Այդ հիանալի դարպասապահին այդպես էլ չի հաջողվում հաղթել միայն այս մրցաշարում:
«Ռեալը» դարձավ առաջին թիմը, որը երկրորդ անգամ անընդմեջ նվաճեց Չեմպիոնների լիգայի գավաթը, Զինեդին Զիդանը, դարձավ առաջին մարզիչը, որը երկրորդ անգամ հասավ նույն հաջողությանը: «Ռեալն» ուժեղ էր ու արժանի էր հաղթանակին: Hala Madrid
