ԵՐԵՎԱՆ, 3 հունիսի — Sputnik, Անի Լիպարիտյան. Մոսկվայի ավիացիոն ինստիտուտի շրջանավարտ Յան Լիխոդիևսկին ավարտել է տիեզերագնացության բաժինը և այսօր պետք է իրական արբանյակներ ուղարկեր տիեզերք, սակայն աշխատում է Sputnik միջազգային տեղեկատվական գործակալության թիմում:
Յանն առաջին անգամ էր Հայաստանում, և այս անգամ նա եկել էր ոչ թե շրջագայելու նպատակով, այլ գործուղման մեջ էր: Sputnik Արմենիայի հետ զրույցում Յանը պատմեց այն մասին, թե ինչպես է սկսել աշխատել ԶԼՄ ոլորտում:
«Այժմ այլ արբանյակներ եմ գործարկում և դրանց ավելի ուրախ եմ, քան տիեզերականներից, քանի որ ավելի հետաքրքիր աշխատանք է, շատ են ուղևորությունները, բազմաթիվ հետաքրքիր մարդկանց ես հանդիպում, շատ բան սովորում: Սեփական աչքերով եմ տեսնում ամեն ինչ, ինձ համար հետաքրքիր է աշխատել Sputnik-ի համար: Տարբեր երկրներ եմ այցելում և կարողանում եմ ուրիշներին պատմել տպավորություններիս մասին»,- ավելացրեց նա:
«Տանն ավելի լավ է…»
Յանի խոսքով` ուղևորություններն ուղևորություններով, բայց հայրենիքում ապրելն ավելի լավ է:
«Թեև շատերն ասում են, որ կցանկանային ապրել արտասահմանում, և գործընկերներիս շրջանում էլ հաճախ եմ լսում նման խոսակցություններ, բայց ես միշտ պատասխանում եմ. «Ապրեք արտերկրում, հետո կխոսենք»: Կարծում եմ, սա նաև հայերից շատերին է վերաբերում: Բոլորը երազում են ապրել Եվրոպայում, Ամերիկայում և Ասիայում: Սակայն նրանք մոռանում են, որ այնտեղ էլ քիչ չեն թերություններն ինչպես բժշկության ոլորտում, այնպես էլ կառավարության աշխատանքում և մի շարք այլ հարցերում»,- ավելացրեց մեր զրուցակիցը:
Յանը նշեց, որ յուրաքանչյուր երկիր իր խնդիրներն ունի, և երբ բարեկամներից կամ հարազատներից որևէ մեկը մտադիր է լինում մեկնել արտասահման՝ բնակություն հաստատելու, նա մի խորհուրդ է տալիս. «Դուք սիրեք ձեր երկիրը, դուք այստեղ եք ծնվել»:
«Իհարկե, յուրաքանչյուրն ինքն է իր երջանկության դարբինը, սակայն շատերի համար սովորություն է դարձել բողոքելը: Երբ ես պատմում եմ, թե ինչպես եմ ապրում, ինձ հարցնում են. «Ինչպես է դա քեզ հաջողվում»: Ես պատասխանում եմ. «Ուղեղներդ միացրեք, և ձեզ մոտ էլ ամեն ինչ լավ կլինի»»,- ասաց ՏՏ մասնագետը:
100 ռուբլին կյանք էր փրկում
Յանը պատրաստ է ներկայացնել իր փորձը և պատմել այն մասին, թե ինչպես կարելի է սկսել տնտեսել: Երբ նրան անհրաժեշտ եղավ Մոսկվայում անշարժ գույք գնել, նա ակամա պարտք արեց նախնական գումարը մարելու համար, բնակարանը գնեց հիփոթեքով, սակայն այդ ժամանակ պետք է վճարեր նաև ավտոմեքենայի վարկը:
Նրա խոսքով` աշխատավարձը չէր հերիքում, սակայն նա պետք է վերանորոգեր նոր գնված բնակարանը:
«Հենց այդ ժամանակ էլ ես սովորեցի ապրել 100 ռուբլով: Մոսկվայում մեծ են հնարավորությունները: Օրինակ, ժամանակին ես որոշեցի ֆիլմերի պրեմիերաների համար վերլուծական հոդվածներ և ակնարկներ գրել: Հաջողակ բլոգերներին և նրանց, ովքեր հետաքրքիր հոդվածներ են գրում, հրավիրում են ֆիլմի նախնական ցուցադրությանը, մինչև պրեմիերայի պաշտոնական օրը: Ես ևս սկսեցի ռեցենզիաներ գրել, օրական 100 ռուբլի էի աշխատում»,- պատմեց Յանը:
Այդ օրերին ընկերները նախանձում էին նրան, քանի որ նա կարող էր ֆիլմի էկրաններ բարձրանալուց մեկ ամիս առաջ դիտել բոլորը:
«Կարծում եմ՝ Հայաստանում էլ գումար աշխատելու մեծ հնարավորություններ կան, որոնք պետք է օգտագործել: Հենց այդպես տնտեսելով էլ ես ճամփորդում եմ: Երբեմն, ընկերներս ասում են. «Դա շատ թանկ է», ես պատասխանում եմ, որ էժան տոմսեր եմ ձեռք բերում, փոքր ճամպրուկ վերցնում, որի համար լրացուցիչ վճարել հարկավոր չէ և ինքս եմ պատրաստում»,- պատասխանեց Յանը:
Այդ պատճառով էլ արձակուրդն ավելի մատչելի է ստացվում, Յանը չի փորձում խիստ տնտեսել, սակայն, ինչպես նա նշեց, «ուղեղն աշխատացնում է տնտեսելու համար»: Մոսկվայի մեր գործընկերը կարծում է, որ սեփական միջոցների ռացիոնալ օգտագործումը հիանալի միջոց է գումարը տնտեսելու համար, և այդ պարագայում այն բավարար կլինի ամեն ինչի համար:
