«Ժողովուրդ». ՌՈ պետն ազատվել է աշխատանքից. Սերժ Սարգսյանի հետ հանդիպման մանրամասները գաղտնի են պահվում
Սերժ Սարգսյանը երեկ այցելել է ՀՀ պաշտպանության նախարարություն և հանդիպում ունեցել ՀՀ զինված ուժերի ղեկավար կազմի հետ: Հանդիպման մանրամասները գաղտնի են պահվում:
Նախագահականի տարածած պաշտոնական հաղորդագրության մեջ իրադարձության մասին մեկ նախադասություն է, որտեղ, սակայն, բառ անգամ չկա քննարկված թեմաների մասին: Նման գաղտնապահությունը հազիվ թե պատահական լինի: Ենթադրվում է՝ հանդիպումը կապված է Ղարաբաղյան խնդրում զարգացումների հետ:
Ի վերջո, հիշում եք՝ մի կողմից միջազգային հանրությունն ակտիվացրել է այս հարցում լուծման հասնելու ջանքերը, բացի այդ՝ վերջերս հաճախակի են դարձել հրադադարի ռեժիմի խախտումները, և բանը հասավ նրան, որ ԵԱՀԿ ՄԽ համանախագահները այդ ամենի համար հասցեական քննադատեցին Ադրբեջանին: Այս ամենին զուգահեռ՝ վերջին օրերին շատացել են զինված ուժերում մահվան ելքով միջադեպերը: Այնպես որ, ենթադրվում է՝ Սերժ Սարգսյանը ՊՆ-ում հենց այս թեմաներով է խոսել: «Ժողովուրդ»-ի տեղեկություններով՝ ԶՈՒ վերջին միջադեպերի պատճառով երեկվա հանդիպումից հետո եղել են նաև պաշտոնանկություններ. աշխատանքից ազատվել է ռազմական ոստիկանության պետ Սամվել Ղուկասյանը:
Ընդ որում, մեր աղբյուրները նրա պաշտոնանկությունը կապում են հենց ԶՈՒ վերջին միջադեպերի հետ, այդ թվում և ջրահեղձ եղած զինվորների դեպքի: Իսկ ՌՈ պաշտոնում նշանակվել է Արթուր Բաղդասարյանը, որը մինչ այդ Սերժ Սարգսյանի թիկնազորի պետ Հրաչյա Հարությունյանի տեղակալն էր:
«Հրապարակ». ՀՌԱՀ-ում 2 թափուր տեղի համար մի քանի հավակնորդ կա
Նախագահն օրերս մրցույթ է հայտարարել Հեռուստատեսության և ռադիոյի ազգային հանձնաժողովի անդամների թափուր տեղերի համար: Դիմելու վերջնաժամկետը մայիսի 29-ն է: Մրցութային հանձնաժողովի նախագահ, ՀՀ նախագահի աշխատակազմի հասարակայնության և տեղեկատվության հետ կապերի վարչության պետ Մերի Հարությունյանը թերթին հայտնեց, որ թեկնածուների անունները հայտնի կդառնան դիմելուց հետո, այժմ ոչինչ չի կարող ասել:
ՀՌԱՀ-ում այժմ 2 թափուր տեղ կա, մեկը՝ Ժիրայր Դադասյանինը, մյուսը՝ Վլադիմիր Օհանյանինը: Այս տեղերի համար մի քանի հավակնորդների անուններ կան։ Վլադիմիր Օհանյանը նույնպես մտադիր է դիմել և վերանշանակվել (ՀՌԱՀ անդամը 2 անգամ կարող է ընտրվել): ՀՌԱՀ անդամի պաշտոնի համար շրջանառվում են նա և նախկին պատգամավոր Ռուզան Առաքելյանի, Նարեկ Սարգսյանի մամուլի խոսնակ Անահիտ Եսայանի անունները:
Վերջինս, սակայն, մեզ հետ զրույցում հերքեց ՀՌԱՀ գնալու մասին լուրերը: Ի դեպ, ՀՌԱՀ-ն այժմ 8 անդամ ունի՝ նախագահը Գագիկ Բունիաթյանն է, անդամներն են Կորյուն Առաքելյանը, Հայկ Քոթանյանը, Տիգրան Հակոբյանը, Արմեն Մկրտչյանը, Ռոլանդ Շառոյանը, Ժիրայր Դադասյանը, Վլադիմիր Օհանյանը։ Դադասյանը, որ ՀՌԱՀ նախագահի տեղակալն է, այլևս չի կարող մասնակցել մրցույթին, նա 2 ժամկետ արդեն պաշտոնավարել է:
«Ժողովուրդ». Դավիթ Հարությունյանը` արդարադատության նախարար նշանակվելու մասին
ՀՀ արդարադատության նախարարի պաշտոնն արդեն մի քանի օր է՝ թափուր է. նախկին նախարար Արփինե Հովհաննիսյանը դարձել է ՀՀ ԱԺ փոխնախագահ: Իսկ հիմա նախարարի հավանական թեկնածուների թվում շրջանառվում է նաև կառավարության աշխատակազմի ղեկավար-նախարար Դավիթ Հարությունյանի անունը:
«Ժողովուրդ»-ի հետ զրույցում Հարությունյանը, խոսելով իր նշանակման հավանականության մասին, ո՛չ հերքել և ո՛չ էլ հաստատել է այդ լուրերը: «Երբ նման որոշում լինի, այդ ժամանակ դրա մասին նոր կարող եմ խոսել»,- ասել է նա: Հարցին՝ իսկ Դուք նման ցանկություն ունե՞ք, Հարությունյանը պատասխանել է. «Ես քաղաքական թիմի անդամ եմ, չեմ հասկանում հարցը… Նոր ժամանակները նոր խնդիրներ են դնում: Ցանկությունն ու առաջարկը տարբեր են: Ես ցանկություն ունեմ ծառայելու երկրին»: Հիշեցնենք, որ Դ. Հարությունյանը ՀՀ արդարադատության նախարարն է եղել 1998-2007 թվականներին»:
«Փաստ». «Դժվար է, երկար» մարզպետների ու համայնքապետերի ճամփան
«Փաստը» գրում է, որ մի քանի ամիս առաջ բոլոր մարզպետներին եւ համայնքապետերին Ամերիկյան համալսարանում հարկադիր ուսուցման ուղարկելու հարցը, կարծես թե, մնացել է օդում կախված, բոլորը զբաղված են աթոռակռվով կամ ընտրությունների ժամանակ իրենց ծառայության դիմաց հասանելիքը փախցնելու հարցերը կարգավորելով:
«Ի դեպ, մեր տեղեկություններով, հարցը որոշել են մոռացության տալ եւ որոշ ժամանակ անց ընդհանրապես փակել, քանի որ այն կարող է շատ ծանր հետեւանքների պատճառ դառնալ մարզպետներից որոշների համար: Հիշեցնենք, որ նախապես որոշվել էր նրանց հարկադիր ուսուցման ուղարկել, հետո մարզպետներից օնլայն քննություն վերցնելու միջոցով պարզել, թե ով ինչ գիտելիք ունի:
Հարկադիր ուսուցումը եթե մի կողմ դնենք, ապա նրանց համար ամենաանհաղթահարելին քննություն հանձնելն է: Այն էլ՝ օնլայն, այսինքն՝ համակարգչի միջոցով: Եվ այստեղ էլ մայրենի լեզվի իմացությունից բացի կբացահայտվի, թե նրանցից ով ինչ չափով է համակարգչին տիրապետում:
Բայց առանց նման դասընթացի էլ վարչապետ- մարզպետներ, վարչապետ-համայնքապետեր երկխոսությունը մի տեսակ վարչապետի մենախոսության է նման»,- գրում է թերթը:
