ԵՐԵՎԱՆ, 15 սեպտեմբերի — Sputnik. Հայաստանի հեռուստատեսության բովանդակությունը չի համապատասխանում «Լեզվի մասին» և «Գովազդի մասին» օրենքներին, իսկ հեղինակային իրավունքը շատ հաճախ չի գործում: Այսօր ԱԺ-ում հայտարարեց Հեռուստատեսության և ռադիոյի ազգային հանձնաժողովի (ՀՌԱՀ) անդամի թեկնածու Տիգրան Հակոբյանը:
Թեկնածուն նաև նշեց, որ մեդիայի` տարիներ շարունակ սովորական դարձած մոդելը վերջին տարիներին շատ արագ փոխվել է՝ ինտերնետի ու լայնաշերտ ձայնատեսային պատկերների սփռման հնարավորությունների զարգացմանը զուգահեռ: Արդյունքում ՀՌԱՀ կարգավորման դաշտում գործող հեռուստաընկերությունները, Տիգրան Հակոբյանի կարծիքով, մոտ ապագայում կարող են մրցակցությունից դուրս գալ, որովհետեւ ինտերնետն ավելի արագ է տեղեկատվությունը հասցնում սպառողներին:
Բացի այդ, նրա խոսքով, եթե ամբողջ աշխարհում հեռուստատեսությունը, որպես հանրային ֆենոմեն ու գիտելիք, կարևոր խնդիրներ է լուծում, մեր հեռուստատեսությունն այդ խնդիրները չի լուծում, ինչն էլ առաջացնում է հանրության դժգոհությունը:
Պատասխանելով պատգամավորների հարցերին` ՀՌԱՀ անդամի թեկնածուն անդրադարձավ հեռուստաեթերում անաչառ ու բազմակողմանի տեղեկատվության ապահովման խնդրին՝ հայտարարելով, որ հանրությունը բազմակողմանի և անաչառ ինֆորմացիա ստանալու իրավունք ունի: Այդուհանդերձ, Տիգրան Հակոբյանի համոզմամբ, մեկ հեռուստաընկերություն լիարժեք բազմակարծություն ապահովել չի կարող:
«Մի հեռուստատեսություն կարող է դավանել սոցիալական, սոցիալիստական ուղղվածություն, մյուսը՝ ազատական և այլն, ու հանրությանն այսպիսով տրվում է ընտրելու հնարավորություն, ինչը որոշ չափով Հայաստանում ապահովված է: Ես կարծում եմ, մի քանի գաղափար ունենալը գլխում շիզոֆրենիայի պես մի բան է»,- ասաց նա:
Պատգամավոր Նիկոլ Փաշինյանը Տիգրան Հակոբյանին հարց ուղղեց «Կիսաբաց լուսամուտներ» հաղորդման ոչ եթերային բովանդակության ու բառապաշարի մասին` հարցնելով, թե ինչ քայլեր կձեռնարկի ՀՌԱՀ նոր անդամը նման հաղորդումների նկատմամբ, որտեղ ՙբանավոր պոռնո տեսարաններ են նկարագրվում»: Տիգրան Հակոբյանը, սակայն, նշեց, որ հանրության շրջանում նաև այդ բովանդակությամբ հաղորդումների պահանջարկ կա, որով լսարան է ապահովվում, իսկ եթերը գրաքննության ենթարկել չի կարելի:
Տիգրան Հակոբյանի ընտրությունը փակ գաղտնի քվեարկությամբ տեղի կունենա այսօր, 13:30-ից 14:30-ը՝ ԱԺ-ի շքամուտքում, գլխավոր դատախազի թեկնածուի ընտրությանը զուգահեռ:
