ԵՐԵՎԱՆ, 6 մայիսի — Sputnik, Անի Լիպարիտյան. Ռուսաստանի հայ համայնքը ձևավորվել է տարբեր մտածելակերպ, կրթություն և բնավորություն ունեցող մարդկանցից, Sputnik Արմենիային տված հարցազրույցում ասաց «Նոյյան տապան» տեղեկատվական-վերլուծական թերթի տնօրեն Յուրի Անիսոնյանը:
Պատասխանելով այն հարցին, թե որն է Ռուսաստանում հայ համայնքի դերը՝ Անիսոնյանը նշեց, որ այդ հարցը մի շարք «երանգներ» ունի:
«Պետք է հաշվի առնել այն փաստը, որ Ռուսաստանի հայկական համայնքում նախկին ԽՍՀՄ-ի տարբեր ծայրերից եկած հայեր կան, որոնք տարբեր կրթություն են ստացել, տարբեր լեզուներով են խոսում: Այդ պատճառով էլ տարբեր մտածելակերպ ունեն: Հայերից շատերը չեն տիրապետում մայրենի լեզվին, բայց իրենց հայ են համարում: Եվ ինձ թվում է՝ դա է ամենակարևորը», — նշեց Անիսոնյանը:
Նրա խոսքով` Ռուսաստանի քաղաքական կյանքում հայերն այդքան էլ ակտիվ չեն, բայց հայերի թիվը մեծ է բժշկության, իրավաբանության, արվեստի ու սպորտի ոլորտներում:
«Բոլոր օլիմպիադաներում հայկական ծագում ունեցող չեմպիոններն ավելի շատ են, քան բուն hայաստանցիները: Ընդ որում` թիմային մարզաձևերում մեզ մոտ ոչինչ չի ստացվում, բայց անհատականում հակառակ պատկերն է: Հարց է ծագում` ինչո՞ւ: Որովհետև հայերն ավելի անհատական ազգ են, քան մյուսները, և այդ պարագայում հայերը հաղթելու ավելի մեծ հնարավորություններ ունեն», — ասաց Sputnik Արմենիայի զրուցակիցը:
Ազգային գաղափարը` հայրենիքի սահմաններից դուրս
Այս տարի կլրանա «Նոյյան տապան» թերթի 20-ամյակը: Անիսոնյանը խոսեց նաև հայրենիքի սահմաններից դուրս ազգային գաղափարն առաջ մղելու մասին: Նրա խոսքով՝ եթե գաղափարը չի հակասում տվյալ երկրի շահերին, ապա խոչընդոտներ չեն լինի:
«Օրինակ՝ Ռուսաստանում մեր թերթի գոյության 20 տարվա ընթացքում մեր և Ռուսաստանի շահերը միշտ համընկել են», — ասաց նա:
Անիսոնյանն ավելացրեց, որ Հայաստանի և Ռուսաստանի շահերն ընդհանրապես շատ հարցերում են համընկնում, այդ պատճատով էլ Ռուսաստանում հրապարակվող հայկական պարբերականը խնդիրներ չի կարող ունենալ:
XXI դարի լրագրողի մասին
Անիսոնյանի կարծիքով՝ ժամանակակից լրագրողն առաջին հերթին պետք է պարզապես գրագետ մարդ լինի:
«Տեսնում եմ, որ երիտասարդներից ոմանք շատ համառ են և մեծ ձգտումներ ունեն, ինչը շատ լավ է: Բայց կա մի խնդիր՝ նրանք սխալներ են թույլ տալիս, խոսքը պարզունակ են շարադրում: Մարդիկ իրենց մայրենի լեզուն չգիտեն ինչպես Ռուսաստանում, այնպես էլ Հայաստանում: Ցավալի փաստ է: Ես եզրակացություններ եմ անում ոչ թե լրատվական կայքերից, այլ թերթերի ու ամսագրերի հրապարակումներից: Սխալներ կան նույնիսկ խմբագրական ուղղումներից հետո», — նշեց նա:
Ըստ նրա՝ լրագրողը միշտ պետք է հնարավորին չափ ազնիվ լինի, այլապես նա պրոֆեսիոնալ չի դառնա:
«Նոյյան տապան» թերթի տնօրենի կարծիքով՝ կարևոր բաղադրիչ է նաև սկզբունքայնությունը:
«Մեծ թվով լրագրողներ զոհվում են մասնագիտական պարտքը կատարելու ժամանակ: Մենք նման դեպքեր ենք տեսել Սիրիայում, Ղարաբաղյան պատերազմի ժամանակ, Ուկրաինայում…: Իսկ նրանք խաղաղ մասնագիտության տեր մարդիկ էին, որոնք ցանկանում էին ցույց տալ կյանքն ինչպես որ կա: Ու դրա համար զոհել էին իրենց կյանքը…», — նշեց Անիսոնյանը:
Նա կարծում է, որ լրագրությունն այսօր ամենավտանգավոր և միևնույն ժամանակ ամենաազնիվ մասնագիտությունն է:
