ԵՐԵՎԱՆ, 14 մարտի — Sputnik. Թղթակից Ալեքսանդր Բալիցկու՝ ինտլեկտուալ Հայաստանի մասին սյուժեն ներկայացվել է Ռոսիա-1 հեռուստաընկերության եթերում՝ Դմիտրի Կիսելյովի «Վեստի նեդելի» ամփոփիչ ծրագրի շրջանակում:
«Դա առաջին ուղևորությունը չէր Հայաստան, բայց հավանաբար ամենահագեցածն էր: Հաջողվեց տեսնել մարդկանց, որոնց միավորում էր իրենց երկրի մասին հնարավորինս շատ պատմելու և ցուցադրելու մեծ ցանկությունը», — Sputnik ռադիոկայանի եթերում ասաց Բալիցկին:
Սյուժեի հեղինակը փորձել է կարճ ռեպորտաժում հնարավորինս բացահայտել հայկական ինտելեկտի թեման: Չունենալով մեծ ֆինանսական միջոցներ և հարուստ բնական պաշարներ՝ հայերը կարող են աշխարհին առաջարկել յուրահատուկ մի բան՝ իրենց «ուղեղները», հմտությունները և կարողությունները, ասում է սյուժեի հեղինակը:
«Ցավոք, մեր նյութում նկարահանումներից շատ բան չի ներառվել տևողության սահմանափակման պատճառով: Հերոսները, որոնց նկարել էինք, կարող են մտածել, թե դա մակերեսային աշխատանք էր», — ափսոսանքով նշում է Բալիցկին:
Սյուժեում չի ներառվել հայ գրող Լիա Ավետիսյանի հետ դրվագը, որը «Այդ անհավանական հայերը» գրքի հեղինակն է, ինչպես նաև հին Երևանի վերակառուցման մասին պատմությունը: Իսկ այն, ինչ հեղինակի կարծիքով՝ ցուցադրվել է «լայն վրձախազերով, շտրիխներով», բխել է Հայաստանի մասին հնարավորինս շատ պատմելու, հայկական ինտելեկտի խճանկարը ստեղծելու ցանկությունից:
«Մենք համակարգված ենք աշխատել, եղել ենք նաև ստեղծարար տեխնոլոգիաների ԹՈՒՄՕ կենտրոնում: Այն ինչ-որ բանով նման է Սոչիի տեխնոլոգիաների կենտրոնին», — նշում է Բալիցկին:
Հեղինակը բավական քննադատաբար է վերաբերվում իր աշխատանքին՝ նշելով, որ ռեպորտաժի վերջնական տարբերակում հայկական խելքի և ինտելեկտի պատկերումը շաբլոնային է ստացվել: Վեցրոպեանոց սյուժեում անդրադարձել են նաև Հայաստանի համար առանձնահատուկ թեմային՝ շախմատին: Չեն մոռացել նշել նաև նշանավոր շախմատիստ, աշխարհի չեմպիոն Տիգրան Պետրոսյանին:
Ռեպորտաժում ընդգրկվել է նաև աշխարհահռչակ շախմատիստ Լևոն Արոնյանի հետ ռեպորտաժը, որին Ալեքսանդրը կարճ բնութագիր է տվել՝ «հաճելի տղա»: Շախմատիստը թղթակցին ցույց է տվել սրահը, որտեղ յուրացրել է շախմատային արվեստի հիմունքները: Այդ սրահում կախված է լեգենդար Պետրոսյանի դիմանկարը, որի խիստ հայացքի ներքո երեխաները շախմատային իմաստություն են սովորում:
«Լևոնը պատմեց, որ անընդհատ վախով է նայել պատին և մտածել. «Էհ, այդքան լավ քայլ չարեցի: Պետրոսյանը չէր հավանի»», — պատմում է Բալիցկին:
Հեղինակը ռեպորտաժում առանցքային պահ է համարում Արոնյանի պատասխանն այն հարցին, թե մարդիկ Հայաստանում ինչու են շախմատ սիրում: Պատասխանը երկար սպասեցնել չի տվել. «Որովհետև հայերը արդարություն են սիրում»:
