ԵՐԵՎԱՆ, 2 մայիսի —Sputnik. Հայաստանի ռուսական ռազմակայանի «Էրեբունի» ավիացիոն բազայում սկսվել է ՄիԳ-29 արդի կործանիչների, Մի-8ՄՏ ռազմափոխադրական և Մի-24Պ հարվածային ուղղաթիռների փոխադրումը շահագործման ամառային ռեժիմի:
Միավորման ինժեներները և տեխնիկները կստուգեն համակարգերի, ագրեգատների, հանգույցների և սարքավորանքի աշխատունակությունը, ինչպես նաև կզննեն վառելիքի բաքերը, շարժիչները, կփոխեն յուղը և հատուկ հեղուկները:
Բացի ավիացիոն տեխնիկայի սպասարկումից, կանցկացվեն նաև ռազմական օդաթռիչքարանի օբյեկտների վերանորոգման-վերականգնման և ստուգման համալիր աշխատանքներ: Միավորման տարածքը բերվում է շահագործման ուսումնամարտական ռեժիմի, իրականացվում են ինժեներական աշխատանքներ, պատրաստվում և վերականգնվում է թռիչքավայրէջքային գոտին, ստուգվում են օդաթռիչքարանի սարքավորանքը և կապի ապարատները:
Շահագործման ամառային պայմաններին սպառազինության և ռազմական ավիացիոն տեխնիկայի պատրաստման միջոցառումներին ներգրավված է միավորման ինժեներա-տեխնիկական ծառայության ավելի քան 200 զինծառայող:
