«Ժողովուրդ». Ինչո՞ւ է դանդաղում նոր խորհրդարանը
«Ժողովուրդ» թերթի հաշվարկով, Սերժ Սարգսյանը նոր խորհրդարանում ունենալու է 85-90 պատգամավոր, որոնք ենթարկվելու են անձամբ իրեն, ընդ որում՝ ոչ միայն ՀՀԿ, այլև մյուս խմբակցություններում:
Թերթի աղբյուրների պնդմամբ, «հենց այս պատճառով էլ ԱԺ անցած ուժերն ընտրություններից մեկ ամիս անց դեռևս չեն հայտարարել, թե թեկնածուներից կոնկրետ ովքեր են ինքնաբացարկ ներկայացնելու և ովքեր են խորհրդարան անցնելու: Բոլոր անունները ճշտվում են Ս. Սարգսյանի հետ»:
«Նրա այս քայլը, թերևս, պատահական չէ. 2018թ. ապրիլից, երբ լրանան նրա նախագահական լիազորությունները, Սարգսյանը մտադիր չէ հեռանալ, այլ միգուցե որպես վարչապետ կամ որպես ՀՀԿ նախագահ իր վերահսկողության տակ է պահելու ողջ իշխանությունը: Առավել ևս, երբ Հայաստանը նոր Սահմանադրությամբ անցում է կատարել խորհրդարանական կառավարման համակարգի»,- գրում է թերթը:
«Հրապարակ». Ով ինչ պաշտոն կստանա նոր ԱԺ-ում
Վերջին ԳՄ նիստից հետո ՀՀԿ վերնախավից «Հրապարակ» թերթին հայտնել են, որ ՀՀԿ խոսնակ, Տարոն Մարգարյանի նախընտրական շտաբի պետ Էդուարդ Շարմազանովը երկար է մնացել նախագահի մոտ` 30-40 րոպե։ Դրանից հետո ենթադրություններ են արվել, թե նրան առաջարկվել է ԱԺ նախագահի աթոռը, բայց Շարմազանովը հերքել է այդ լուրերը:
Ըստ թերթի` ՀՀԿ-ում հնարավոր են համարում նրա ԱԺ նախագահ դառնալը, մանավանդ որ երիտթևում նրա օգտին լոբբինգ անողները բավականին շատ են:
«ՀՀԿ-ի մասով այս պահի դրությամբ հայտնի է` Արփինե Հովհաննիսյանը հաստատապես գնում է ԱԺ` պետաիրավական հարցերի հանձնաժողովի նախագահի հնարավոր հեռանկարով, իսկ եթե ԱԺ նախագահ դառնա Շարմազանովը, գուցե նաև ԱԺ փոխնախագահի հեռանկարով: Հրայր Թովմասյանը չի դառնում ո՛չ պետաիրավական հարցերի հանձնաժողովի նախագահ և ո՛չ էլ արդարադատության նախարար. առժամանակ` մինչև 2018թ., մնում է ԱԺ-ում: Ասում են՝ նստելու է Մհեր Շահգելդյանի սենյակում, իսկ 18-ին կգնա ՍԴ` նախագահելու: Ի դեպ, միանշանակ է նաև Վիգեն Սարգսյանի կարգավիճակը. նա մնում է ՊՆ-ում»,- գրում է թերթը:
«Ժամանակ». Վարչապետը մտադիր է ՀՅԴ նախարարներին փոխարինել կանանցով
«Ժամանակ» թերթի տեղեկություններով` երեկ Դիլիջանի «Գետափ» ռեստորանում տեղի է ունեցել էկոնոմիկայի նախարար Սուրեն Կարայանի ծննդյան 44-րդ տարեդարձը։ Շքեղ ծննդյան տոնակատարությանը ներկա են եղել բոլոր նախարարները, բացի ՀՀ կրթության և գիտության նախարար, դաշնակցական Լևոն Մկրտչյանից։
Ծննդյան տոնի ամբողջ ընթացքում վարչապետ Կարեն Կարապետյանը դաշնակցական նախարարների վերաբերյալ կատակներ է արել: Մասնավորապես՝ ասել է, որ դաշնակցական նախարարներին մտածում է կանանցով փոխարինել։
«Ծննդյան տոնին ներկա մեր աղբյուրի պնդմամբ՝ դաշնակցական Դավիթ Լոքյանն ու Արծվիկ Մինասյանն իրենց կուսակցության մասին անեկդոտներին և կատակներին արձագանքել են ոչ դաշնակցական նախարարներից ոչ պակաս ուրախությամբ»,- գրում է թերթը:
«Հրապարակ». Ընտանեկան հավաքույթ՝ քաղաքական էլիտայի մասնակցությամբ
Թերթի տեղեկություններով` մի քանի օր առաջ «Օջախ» ռեստորանային համալիրի փոքր սրահում տեղի է ունեցել Սերժ Սարգսյանի մեկ տարեկան թոռնիկի` Տիգրանի մկրտության արարողությունը:
«Միջոցառումը եղել է հիմնականում ընտանեկան: Քաղաքական էլիտայից շատ հրավիրյալներ չեն եղել. ներկա են եղել Բակո Սահակյանը, Արկադի Ղուկասյանը, Վիգեն Սարգսյանը, Լևոն Յոլյանը, Տարոն Մարգարյանը: Չի եղել վարչապետ Կարեն Կարապետյանը: ՀՀԿ երիտթևն է ներկա եղել` Աշոտյան, Շարմազանով, Հովիկ Հովսեփյան, Գյումրու` Արման Սահակյան քառամիասնությամբ, որպես փոքրիկի հոր` Հայկի ընկերներ: Հետաքրքիր է, որ ներկա են եղել նաև Արայիկ Գրիգորյանը, Ռուբեն Հայրապետյանը, Սամվել Ալեքսանյանը, Առաքել Մովսիսյանը և ՍԱՍ-ի Արտակը»,- գրում է թերթը:
«Հայոց աշխարհ». Թուրքական շանտաժ՝ Հայաստանի և Ռուսաստանի նկատմամբ
Մայիսի 3-ին Սոչիում նախանշված Պուտին-Էրդողան հանդիպման նախօրեին «Հայոց աշխարհ» թերթն անդրադարձել է հայ-ադրբեջանական սահմանի երկայնքով անցկացվող թուրք-ադրբեջանական համատեղ զորավարժություններին, որոնք, հոդվածագրի բնորոշմամբ՝ «ՀՀ-ի և Արցախի դեմ ուղղված կոլեկտիվ շանտաժի տպավորություն են թողնում»:
«Եթե Ռուսաստանի ռազմաքաղաքական սերտ դաշնակցի տարածքում տեղակայված ռուսական ռազմական հանգրվանի հարևանությամբ մայիսի 1-5-ը կազմակերպվում են զորավարժություններ և նույն օրերին՝ մայիսի 3-ին, Էրդողանը թռչում է Սոչի՝ հանդիպելու Վ.Պուտինի հետ, ապա ռուսական կողմը բոլոր հիմքերն ունի այս ամենը գնահատելու որպես ակնհայտ շանտաժ ոչ միայն Հայաստանի, այլև հենց իր դեմ»,- եզրակացնում է թերթը:
