ԵՐԵՎԱՆ, 11 ապրիլի – Sputnik. Հայաստանի ազգային փոքրամասնություններից նոր Ազգային ժողովում ներկայացված կլինեն եզդիները, ռուսները, ասորիներն ու քրդերը, յուրաքանչյուրը` մեկական պատգամավորով: Սա նոր ընտրական օրենսգրքի պարտադիր պահանջն է։ Ասորի, քուրդ և եզդի պատգամավորները կանդամակցեն Հանրապետական խմբակցությանը, ռուս պատգամավորը՝ «Ծառուկյան» դաշինքին` որպես մեծությամբ երկրորդ խմբակցության:
Հայաստանում քրդական համայնքի ղեկավար Կնյազ Հասանովից ու ասորիների «Աթուր» միության նախագահ Արսեն Միխայլովից հետաքրքրվեցինք` արդյոք այդ քաղաքական դիրքորոշումը համընկնո՞ւմ է ամբողջ համայնքի քաղաքական հայացքների հետ:
«ՀՀԿ-ն մեզ ընդունել է իրենց շարքերում, իրենց ընտրացուցակներում՝ որպես պատգամավորության թեկնածու, և մենք աշխատել ենք, որ մեր համայնքի ձայները տրվեն ՀՀԿ-ին, և այսօր էլ այդ կուսակցության ցուցակով անցնում ենք ԱԺ: Համայնքում, իհարկե, կլինեն ընդդիմադիրներ»,- ասաց Կնյազ Հասանովը՝ ավելացնելով, որ ՕՐՕ դաշինքի քարոզարշավի ընթացքում տեսել է բանակում զոհված քուրդ զինվորի տատին, որը հայտարարել է, թե սատարում է Սեյրան Օհանյանին:
«Մի տան մեջ էլ կան ընդդիմադիր և իշխանամետ, նույնը նաև համայնքներում»,- ասաց նա:
Ասորական միության նախագահ Արսեն Միխայլովն էլ նշեց, որ իշխող Հանրապետական կուսակցությունը քաղաքական ուժերից ամենամեծ աջակցությունն է ցույց տալիս ասորական համայնքին: ՙԲայց ասել, որ մեր համայնքը 100 %-ով սատարել է, սխալ կլինի: Կան քիչ տոկոսով ընտրողներ, որ ուրիշ ուժերի են սատարել՚,- ասաց Միխայլովը:
Ազգային փոքրամասնության ներկայացուցիչները վստահ են, որ կկարողանան ԱԺ-ի իրենց աշխատանքով աջակցել հարազատ համայնքին՝ բարձրաձայնելով ազգային կրթության, մշակույթի, անձի իրավունքների, կենցաղային խնդիրները:
Իսկ իրենց փոքրաթիվ լինելն ԱԺ-ում նպատակների իրականացմանը չի խոչընդոտի:
Ազգային փոքրամասնություններն անկախ Հայաստանի խորհրդարանում առաջին անգամ են ներկայացված լինելու: Սա, ըստ բանախոսների, էթնիկ համայնքներում մեծ ոգևորություն է առաջացրել, ընդ որում, ոչ միայն Հայաստանում, այլև աշխարհում:
Ասորական համայնքի ներկայացուցչի խոսքով` աշխարհի ասորիների թիվ մեկ լուրն այսօր Հայաստանի խորհրդարանում պատգամավոր ունենալն է, քանի որ աշխարհի որևէ այլ երկում բնակվող ասորիները նման արտոնություն չունեն:
