ԵՐԵՎԱՆ, 20 ապրիլի — Sputnik. Ռուսական Forbes հրատարակչությունն այսօր հրապարակել է ռուսաստանցի 200 ամենահարուստ գործարարների ցանկը, որում ռուսաստանաբնակ հայազգի 8 մեծահարուստ կա:
Ցուցակում առաջին հայը 18-րդ հորիզոնականը զբաղեցնող «Մագնիտ» ընկերության գործադիր տնօրեն, 49-ամյա Սերգեյ Գալիցկին է (նախքան ամուսնությունը՝ Հարությունյան): Նրա կարողությունը Forbes-ը գնահատում է 6,8 մլրդ դոլար:
90-ականների սկզբում Գալիցկին իր աշխատանքային ուղին սկսել է Կրասնոդարի կոմերցիոն բանկերից մեկում, ապա հիմնել սեփական առաջին առևտրային ընկերությունը: Գալիցկին նաև Կրասնոդարի ֆուտբոլային ակումբի սեփականատերն է:
Ցուցակի 32-րդ հորիզոնականը զբաղեցրել է «Տաշիր Գրուպ» ձեռնարկության սեփականատեր Սամվել Կարապետյանը: Նրա կարողությունը Forbes-ը 3 մլրդ 400 մլն դոլար է գնահատել:
Forbes-ը փաստում է, որ 90-ականների սկզբում Սամվել Կարապետյանը եղբոր՝ Կարեն Կարապետյանի հետ հարստացել է Հայաստանի Տաշիր համայնքում ունեցած էմալապատված ամանեղենի գործարանի արտադրանքը Ռուսաստան արտահանելով: Հոդվածի հեղինակների խոսքով` հենց այս գործունեության արդյունքում էլ Սամվել Կարապետյանը Ռուսաստանում ձեռք է բերել առաջին գործնական կապերը:
2015 թ-ին «Տաշիրը» դարձավ Հայաստանի էլեկտրական ցանցերի սեփականատեր:
Սամվել Կարապետյանի կինը Best սպա-կենտրոնների ցանցի, դուստրը՝ «Սինեմա սթար» կինոթատրոնների ցանցի սեփականատերերն են:
48-րդ հորիզոնականում «Ռոսգոսստրախ» ապահովագրական ընկերության գործադիր տնօրեն, ազգությամբ հայ Դանիլ Խաչատուրովն է՝ 2 մլրդ ունեցվածքով:
Հետաքրքրական է, որ ապահովագրական բիզնես սկսելու միտքը Խաչատուրովը հղացել է այն ժամանակ, երբ 2000 թ-ին գողացել են նրա 3 ավտոմեքենաները:
Հաջորդ հայը ռուս գործարարների ցանկի 99-րդ հորիզոնականում բարերար Ռուբեն Վարդանյանն է, ում կարողությունը հաշվարկվում է 950 միլիոն դոլար:
Հետաքրքրական է, որ վերջին 2-3 տարիներին Ռուբեն Վարդանյանի կարողությունն անփոփոխ է մնացել, այն դեպքում, երբ 2011- 2015թթ-ին այն ավելացել էր 450 մլրդ դոլարով:
123-րդ հորիզոնականում ՙՍկարլետ՚ ընկերության սեփականատեր, մեր հայրենակից Ալբերտ Ավդոլյանն է՝ 800 մլն դոլար կարողությամբ: Անշարժ գույքի առք ու վաճառքի ամերիկյան Blockshopper կայքի տվյալներով, 2009թ-ին Ավդոլյանն ու նրա կինը՝ Ելենան 13 մլն դոլարով առանձնատուն են գնել Բևերլի Հիլզում:
146 և 147 հորիզոնականներում ռուսաստանաբնակ հայազգի եղբայրներ Նիկոլայ և Սերգեյ Սարկիսովներն են՝ յուրաքանչյուրը 700 մլն դոլար կարողությամբ: Հայազգի միլիոնատեր եղբայրների հայրը խորհրդային տարիներին Անաստաս Միկոյանի մտերիմներից էր, ով ակտիվ մասնակցություն է ունեցել ԽՍՀՄ արտաքին առևտրի նախարարության հիմնադրման գործում: Նախկին խորհրդային գործչի որդիներն այսօր իրենց ՙՌԵՍՈ-Գարանտիա՚ ընկերությամբ այսօր գրավում են ռուսաստանյան անշարժ գույքի ապահովագրության շուկայի 1/3-ը:
Ռուսաստանցի մեծահարուստների ցուցակում վերջին հայ գործարարը Mamba և Badoo ծանոթությունների ինտերնետ-ծառայության սեփականատեր Անդրեյ Անդրեևն է (Օհանջանյան): Նա իր 500 մլն դոլար կարողությամբ Forbes-ի ցուցակում 185-րդն է:
Ի դեպ, 2012 թ-ին Անդրևի կարողությունը 900 մլն դոլար էր կազմում, 2013-14թթ-ը՝ 800, իսկ 2015թ-ից սկսած՝ 500 մլն:
Համացանցային ծանոթությունների հաշվին հարստություն դիզած գործարարը, թեև գրանցված է ՌԴ-ում, բայց մշտապես բնակվում է Լոնդոնում:
