ԵՐԵՎԱՆ, 9 մարտի — Sputnik. Ռուսաստանի գործարար հայերը կարող են առանցքային դեր խաղալ Հայաստանում ապրիլի 2-ին անցկացվող խորհրդարանական ընտրությունների ժամանակ, ընդ որում, նրանք ավելի շատ հույսները դրել են վարկանիշային քվեարկության և քաղաքական դիվիդենտների վրա, գրում է Forbes-ը։
Պարբերականը նշում է, որ Ռուսաստանի հայկական սփյուռքին պատկանող կառույցների առաջնորդներն ավանդաբար սերտ կապեր են պահպանում Հայաստանի իշխանությունների հետ։ Սամվել Կարապետյանը, Ռուբեն Վարդանյանը, Սերգեյ Համբարձումյանը, Նիկոլայ և Սերգեյ Սարգիսովները ակտիվ ներդրումներ են անում Հայաստանի տնտեսության մեջ, ինչը մեծացնում է նրանց դերը երկրի հասարակա-քաղաքական կյանքում։
«Ավելին, նրանք մեծ սեր ու հարգանք են վայելում լայն հասարակության շրջանակում։ Հայաստանում դժվար է խոշոր ծրագիր գտնել, որտեղ այդ գործարարներն իրենց ներդրումները չունենան», — գրում է Forbes-ը։
Պարբերականը կարծիք է հայտնում, որ Ռուսաստանի հայ գործարարները, խոշոր ներդրումներ կատարելով Հայաստանի տնտեսության մեջ, հույս ունեն հեղինակության և քաղաքական դիվիդենտներ շահել։
«Օրինակ` 2013 թվականին Սերգեյ և Նիկոլայ Սարգիսովները Լոս Անջելեսում և Լիոնում համապատասխանաբար Հայաստանի գլխավոր հյուպատոսներ նշանակվեցին», — նշում է Forbes-ը։
Պարբերականը գրում է նաև, որ առաջիկա խորհրդարանական ընտրություններին հայկական սփյուռքի ֆինանսական էլիտայի գործոնը առանցքային կդառնա։
