ԵՐԵՎԱՆ, 4 ապրիլի — Sputnik, Լաուրա Սարգսյան. Վեցերորդ համագումարի Հայաստանի խորհրդարանի ընտրությունները դրական գնահատականի են արժանացել բազմաթիվ փորձագետների և դիտորդների կողմից։ Սոցիոլոգ Ահարոն Ադիբեկյանը Հայաստանի հետընտրական քաղաքական վիճակը համեմատում է ХХ դարի 50-ականներին Ֆրանսիայի նախագահ Շառլ Դե Գոլի իրականացրած բարեփոխումների հետ։
«Դե Գոլը արձակեց Սենատը և նոր Սահմանադրություն ընդունեց։ Կարևոր չէ, թե ինչ գաղափարախոսություն ունես, եթե իշխանության ես գալիս՝ պետք է ծառայես երկրիդ ազգային գաղափարախոսությանը. այսպիսինն էր նրա քաղաքական մոտեցումը», — ասաց Ահարոնյանը։
Նա հույս ունի, որ ապագա քաղաքական կոալիցիան, կուսակցությունները, որոնք կընդգրկվեն խորհրդարանի կազմում, կպաշտպանեն ոչ թե իրենց քաղաքական ուժերի շահերը, այլ պետության։
Անկախ իշխող ՀՀԿ-ի համոզիչ հաղթանակի, խորհրդարանում կոալիցիա է կազմվելու ՀՅԴ-ի մասնակցությամբ։ Հանրապետականների և «Ծառուկյան» դաշինքի միջև ձայների զգալի տարբերությունը սոցիոլոգը տրամաբանական է համարում։
Ադիբեկյանի կարծիքով` դաշինքի առաջնորդ Գագիկ Ծառուկյանը Հայաստանի ընտրազանգվածի վերաբերյալ սխալ պատկերացում ունի։
«Ծառուկյանի համար ընտրողները` միասնական, նրան սիրող զանգվածն է։ Բայց չէ՞ որ մարդիկ տարբերվում են տարիքով, սեռային պատկանելիությամբ, կարգավիճակով, նրանք կրթության տարբեր մակարդակներ ունեն։ Նույնքան սխալ էր նա վերաբերվում ընտրազանգվածի նկատմամբ նաև նախորդ ընտրությունների ժամանակ»,- ասաց Ադիբեկյանը։
«Օհանյան-Րաֆֆի-Օսկանյան» դաշինքի ցուցաբերած ցածր արդյունքը սոցիոլոգը բացատրում է «Ժառանգություն» կուսակցության առաջնորդ Րաֆֆի Հովհաննիսյանի պասիվությամբ։ Եթե նա ավելի շուտ միանար դաշինքին կամ ընտրություններին միայնակ մասնակցեր, պատկերն այլ կլիներ։ Ինչպես ցույց տվեց Ադիբեկյանի ղեկավարած սոցիոլոգիական կենտրոնի անցկացրած հարցումը` «Օհանյան-Րաֆֆի-Օսկանյան» դաշինքի մասին գիտի ՀՀ քաղաքացիների միայն 35 տոկոսը։
2015 թվականին ընդունված սահմանադրական փոփոխություններից հետո Հայաստանում ապրիլի 2-ին անցկացվեցին առաջին համապետական ընտրությունները, որով նախատեսվում է անցում կատարել կառավարման խորհրդարանական համակարգին երկրի ներկա ղեկավարի իրավասությունների ժամկետի ավարտից՝ 2018 թվականից, հետո:
Ըստ ԿԸՀ-ի նախնական տվյալների՝ իշխող Հանրապետական կուսակցությունը ստացել է 49,12% (771 247 քվե), «Ծառուկյան» դաշինքը ՝ 27,32% (428 965), ՀՅԴ-ն՝ 6,57% (103 173), «Ելք» դաշինքը՝ 7,77% (122 049), «Հայկական վերածնունդ» կուսակցությունը՝ 3,71% (58 277), «Օհանյան-Րաֆֆի-Օհանյան» դաշինքը՝ 2,7% (32 504), «Կոնգրես-ՀԺԿ» դաշինքը ՝ 1,65% (25 975), «Ազատ դեմոկրատներ» կուսակցությունը՝ 0,94% (14 746), Հայաստանի կոմունիստական կուսակցությունը՝ 0,75% (11 745 քվե)։
Ընտրություններին ընտրողների մասնակցությունը կազմեց 60,93% (կամ 1 573 323 մարդ)։ Ընտրություններին մասնակցելու իրավունք ուներ 2 588 590 ընտրող։ Ընտրական օրենսգրքի համաձայն՝ քվեարկության վերջնական արդյունքները կհրապարակվեն յոթ օրվա ընթացքում։
