ԵՐԵՎԱՆ, 3 ապրիլի — Sputnik. Հայաստանն իր քվեարկության գործընթացով զգալիորեն առաջ է անցել ուրիշ երկրներից, երկուշաբթի Sputnik Արմենիա մուլտիմեդիոն մամուլի կենտրոնում հայտարարեց ՌԴ Դաշնային ժողովի Պետդումայի ԱՊՀ գործերով, եվրասիական ինտեգրման ու հայրենակիցների հետ կապերի կոմիտեի առաջին փոխնախագահ, ԱՊՀ երկրների ինստիտուտի ղեկավար Կոնստանտին Զատուլինը։
Նրա խոսքով` Ռուսաստանում ուսումնասիրել են ՀՀ ընտրական նոր օրենսգիրքը, որում բազմաթիվ փոփոխություններ են կատարվել։ Ըստ Զատուլինի` այդ փոփոխությունները կցրեն ընտրությունների արդյունքների վերաբերյալ կասկածները կցրվեն և կբացառեն ընտրակեղծիքների հնարավորությունը։
«Այս մասով Հայաստանը շատ առաջ է անցել մյուս երկրներից, ես նկատի ունեմ քվեարկելու կարգը և քվեաթերթիկը հաստատելուց առաջ մի քանի փուլով անցնելու անհրաժեշտությունը», — ասաց Զատուլինը։
Նրա խոսքով` իհարկե, խախտումներ եղել են, բայց դրանք չեն ազդում ընտրությունների վերջնական պատկերի վրա։
Զատուլինը վստահեցրեց, որ ընտրական համակարգը կարելի է «հղկել», մի քիչ դյուրացնել։ Նա հույս հայտնեց, որ Կենտրոնական ընտրական հանձնաժողովն ու Հայաստանի խորհրդարանն ամենայն հավանականությամբ ապագայում կզբաղվեն դրանով։
Ապրիլի 2-ին կայացած խորհրդարանական ընտրությունների նախնական տվյալներով` ԱԺ կանցնի 4 ուժ` ՀՀԿ-ն, «Ծառուկյան» և «Ելք» դաշինքները, ՀՅԴ-ն։
ԿԸՀ նախնական տվյալներով` ապրիլի 2-ին կայացած նտրություններում քվեարկելու իրավունք ունեցող 2 մլն 588 հազար 590 քաղաքացիներից ընտրությանը մասնակցել է 1 մլն 577 հազար 323 քաղաքացի կամ քվեարկելու իրավունք ունեցող քաղաքացիների 60,93 տոկոսը:
