ԵՐԵՎԱՆ, 4 ապրիլի – Sputnik. ԿԸՀ-ն հրապարակել է ապրիլի 2-ին կայացած խորհրդարանական ընտրություններին մասնակցած քաղաքացիների ցուցակները՝ նրանց ստորագրություններով: Սա նոր Ընտրական օրենսգրքի պարտադիր պահանջ է, որն, ի դեպ, օրենքի նախագծի քննարկման ընթացքում բավական լուրջ մեկնաբանությունների առիթ դարձավ:
Որոշ քաղաքական գործիչների համոզմամբ, դրանով խախտվում է ընտրողի անձնական տվյալների գաղտնիության իրավունքը: Հակառակ կարծիքի համաձայն` ցուցակների հրապարակումը հնարավորություն կտա ստուգել, ընտրություններին մասնակցած քաղաքացիների ինքնությունը:
Նշենք, որ ԿԸՀ հրապարակած պաշտոնական տվյալների համաձայն` 2 միլիոն 587 հազար 706 ընտրելու իրավունք ունեցող քաղաքացիներից ապրիլի 2-ի ընտրություններին մասնակցել է 1 միլիոն 574 հազար 947-ը կամ 60,86 %-ը:
