ԵՐԵՎԱՆ, 18 մարտի — Sputnik, Անի Լիպարիտյան. Հայաստան այցելող զբոսաշրջիկներն այսուհետև կկարողանան ոչ միայն տեսարժան վայրեր և թանգարաններ այցելել, այլև բացահայտել «գինու զբոսաշրջության» համը:
Զբոսաշրջության այս ուղղությունը զարգացնելու համար Ալպինիզմի և լեռնային տուրիզմի հայկական ֆեդերացիան և Voskeni Wine գինեգործական տնտեսությունը համագործակցության հուշագիր են ստորագրել:
«Մենք համատեղ հուշագիր ենք ստորագրել, որովհետև զբոսաշրջության ոլորտում շատ անելիք կա, իսկ այդ ապրանքանիշը զբոսաշրջության զարգացման առումով առանձնահատուկ տեղ է զբաղեցնում: Հատկապես վերջին տարիներին մենք դրական միտումների աճ ենք տեսնում», — Sputnik Արմենիային տված հարցազրույցում ասաց Հայաստանի ալպինիզմի ֆեդերացիայի փոխնախագահ Սուրեն Դանիելյանը:
Նրա խոսքով՝ Ֆեդերացիան պատրաստ է զբոսաշրջիկների մեծ հոսք ապահովել տարբեր երկրներից:
«Ցանկացած զբոսաշրջիկի համար հետաքրքիր կլինի տեսնել, թե ինչպես է գինին պատրաստվում գինեգործական հսկայական տարածքներում: Իսկ մեր գործընկերները, որոնց հետ հուշագիր ենք ստորագրել, կարող են ներկայացնել հայկական գինու պատրաստման տեխնոլոգիան: Իհարկե՝ չմոռանալով նաև համտեսի մասին», — ասաց նա:
Դանիելյանի խոսքով` գինեգործների հետ համագործակցությունը, այսպես ասած, միջնորդի կարգավիճակ է տալիս Ալպինիզմի և լեռնային տուրիզմի հայկական ֆեդերացիային` կամուրջ դարձնել գինեգործների և զբոսաշրջիկների միջև:
Voskeni Wine ապրանքանիշի տնօրեն Սուսաննա Դավոյանն իր հերթին նշեց, որ գինու արտադրությունը ընտանեկան բիզնես է դարձել:
«Այդ պատճառով մենք բոլորս աշխատում ենք որակյալ գինի ստանալ: Այս համագործակցության շրջանակում ուզում ենք բարձրացնել զբոսաշրջության մակարդակը, մասնավորապես` առաջ մղել «գինու զբոսաշրջությունը», որն այնքան էլ զարգացած չէ Հայաստանում», — ասաց Դավոյանը:
Դիտակետում հիմնականում լինելու են օտարերկրյա հյուրերը: Անցյալ տարի զբոսաշրջիկների մի քանի խումբ եկել է Մոսկվայից, իսկ այս տարի հյուրեր են սպասվում ԱՄԷ-ից և Ռուսաստանից:
Դավոյանը նշեց, որ օտարերկրյա զբոսաշրջիկները կկարողանան համտեսել հայկական խաղողի էնդեմիկ տեսակներից պատրաստված կարմիր և սպիտակ գինիները: Նա ավելացրեց, որ զբոսաշրջային այս ուղղության «բումն» արդեն զգացվում է, և գինեգործները հույս ունեն, որ 2017 թվականին զբոսաշրջիկների հոսքը կմեծանա:
