ԵՐԵՎԱՆ, 10 մարտի — Sputnik. Հայկական «Շանթ» հեռուստաընկերության պատվերով Հասարակական կարծիքի ուսումնասիրման համառուսաստանյան կենտրոնի անցկացրած հարցման արդյունքները վկայում են, որ ՀՀԿ-ն «Ծառուկյան» դաշինքին զիջում է 7%-ով։ Պատասխանելով այն հարցին, թե ում են իրենց ձայները տալու ապրիլի 2-ին նախատեսված խորհրդարանական ընտրություններին, հարցվածների 26%-ը նշել են «Ծառուկյան դաշինքը», իսկ 19%-ը նախապատվությունը տվել է ՀՀԿ-ին։
Նախընտրական պայքարի մյուս մասնակիցները զգալիորեն հետ են այս երկու քաղաքական ուժերից։ Այսպես, օրինակ, և՛ «Ելք» դաշինքի, և՛ «Դաշնակցություն» կուսակցության համար իրենց ձայները պատրաստ են տալ հարցվածների 3%-ը, «Հայկական վերածնունդ» կուսակցությանը 2%-ը, «Կոնգրես-ՀԺԿ» և «Օհանյան-Րաֆֆի-Օսկանյան» դաշինքների, ինչպես նաև Կոմկուսին` 1%։ Ընդ որում 25%-ը դժվարացել են պատասխանել, իսկ 13%-ը նշել, որ նրանք կողմնորոշվել են, թե ում օգտին են քվեարկելու, սակայն չեն բացել փակագծերը։
Հարցումն անցկացվել է փետրվարի 26-27-ը։ Մինչ ընտրությունների մեկնարկը փետրվարի 23-ից մարտի 2-ը ևս մեկ հետազոտություն էր անցկացվել Ռոմիր ընկերության կողմից։
Այս հարցումն էլ նմանատիպ արդյունք ցույց տվեց, հարցվածների շարքում առաջատար դարձավ «Ծառուկյան» դաշինքը։ Սրա առանձնահատկությունն այն էր, որ հարցվածների շրջանում մեծ վստահության ցուցանիշ արձանագրվեց ներկայիս ՀՀ վարչապետ Կարեն Կարապետյանի նկատմամբ։ Հարցման տվյալների համաձայն` ՀՀ քաղաքացիների մոտ 82%-ը, այսպես կամ այնպես, ցանկանում են Կարապետյանին տեսնել վարչապետի դերում նաև ընտրություններից հետո։
Հատկանշական է, որ ՀՀԿ և «Ծառուկյան» դաշինքի (նախկին ընտրություններին` ԲՀԿ) միջև տարբերություն կար նաև 2007 և 2012 թվականների խորհրդարանական ընտրությունների քարոզարշավից առաջ` և կրկին ԲՀԿ-ի օգտին ։ Սակայն ՀՀԿ-ին միշտ հաջողվել է բարձրացնել վարկանիշը հենց նախընտրական քարոզարշավի ընթացքում։ Ավելին` եթե այժմ տարբերությունը կազմում է 3-4%, ապա 2007-2012 թվականներին, մինչև քարոզարշավը, ԲՀԿ-ն գերազանցել է հանրապետականների վարկանիշը մոտ 15%-ով։
Խորհրդարանական ընտրությունների քարոզարշավը Հայաստանում մեկնարկեց մարտի 5-ին և կտևի մինչև մարտի 31-ը։ Ընտրություններին մասնակցում է 9 քաղաքական ուժ` 5 կուսակցություն և 4 դաշինք։ Հայաստանի ԿԸՀ-ն 2017 թվականի հունվարի 9-ին հաստատել է ԱԺ ընտրություններին նախապատրաստվող հիմնական միջոցառումների գրաֆիկը։
Քվեարկությունը կսկսվի ապրիլի 2-ին տեղի ժամանակով ժամը 08:00 և կավարտվի 20:00-ին։ Քվեարկության նախնական արդյունքները կամփոփվեն և կհրապարակվեն ապրիլի 3-ին մինչև 20:00։ Սա առաջին համապետական ընտրությունն է 2015 թվականի դեկտեմբերի 6-ի սահմանադրական հանրաքվեից հետո. Հայաստանը կանցնի կառավարման խորհրդարանական մոդելին։
