ԵՐԵՎԱՆ, 9 մարտի — Sputnik. Ֆինանսների նախարարությունն այն ոլորտն է, որտեղ շատ աշխատանք կա. Բոլորը չպետք է զբաղվեն նախընտրական մրցավազքով, Sputnik Արմենիային տված հարցազրույցում ասաց ՀՀ ֆինանսների նախարար Վարդան Արամյանը` անդրադառնալով այն հարցին, թե ինչու է իր անունը բացակայում ԱԺ պատգամավորների թեկնածունեի ցուցակում։
«Ես այսպիսի մոտեցում ունեմ. կուսակցությունը որոշակի ակումբ է, որի անդամները նույն գաղափարի կողմնակիցներ են։ Դա թիմ է, որը պատասխանատվություն է կրում որոշակի գործընթացների համար։ Պետության կառավարման գործում բոլորը չեն կարող նույն գործառույթն իրականացնել։ Անհանգիստ ծովով լողացող նավում բոլորը չեն կարող կապիտան կամ շտուրման լինել»,- ասաց Արամյանը։
Նրա խոսքով` իր գործառույթը ֆինանսների նախարարությունը կառավարելն է, քանի որ այնտեղ շատ գործ կա։ Սա այն ոլորտն է, որտեղ, նախարարի կարծիքով, որևէ երկիր չի կարող պարծենալ, ե հասել է ամենաբարձր կետին և այլևս անելիք չունի արդյունավետության ու թափանցիկության բարձրացման առումով։
Ինչ վերաբերում է նախարարի ապագային, ապա այդ հարցը պետք է լուծի թիմը։
«Անկեղծ ասած, ես երբեք որևէ կոնկրետ տեղում լինելու նպատակ չեմ ունեցել։ Կյանքի նպատակը մեկն է` որտեղ էլ լինես, պետք է նվիրվես գործին ու այն առավելագույնս լավ անես։ Դա է հաղթանակի գրավականը»,- նշեց Արամյանը։
Միաժամանակ, ըստ նախարարի, կուսակցությանը կարելի է օգնել նաև առանց նախընտրական քարոզարշավին մասնակցելու։
«Եթե ես Հանրապետական կուսակցությունից եմ և այդ պաշտոնը ստանալով որոշակի արդյունք եմ ցույց տալիս, դա նույնպես կարող է ժողովրդին վստահություն ներշնչել, որ ոլորտում ամեն ինչ ճիշտ ճանապարհով է գնում»,- ասաց Արամյանը։
Նախարարը կարծում է, որ բոլորը չեն կարող մասնակցել նախընտրական մրցավազքին, թիմի մի մասը պետք է աշխատի թիկունքում, որպեսզի պետական անիվը կանգ չառնի։
