Լաուրա Սարգսյան, Sputnik.
Լրագրողների հետ զրույցում Վրաստանում Հայաստանի վարչապետ Կարեն Կարապետյանն իր երկօրյա պաշտոնական այցի ժամանակ հայտարարեց, որ Վերին Լարսին այլընտրանք անպայման լինելու է, քանի որ հայկական կողմը պայմանավորվածություն է ձեռք բերել Վրաստանի կառավարության հետ։ Վարչապետը չբացեց փակագծերը, սակայն նրա խոսքերը Վրաստանի ընդդիմադիր ուժերի համար առիթ դարձան աղմուկ բարձրացնելու երկու կողմերի համար այդ ցավոտ թեմայի շուրջ։
Վրաստանի ընդդիմությունը կառչել է հայ վարչապետի հայտարարությունից և որոշել ազդել Վրաստանում գործող «Վրացական երազանք» կոալիցիայի վրա` մամուլում շրջանառելով աբխազական երկաթգծի թեման։ Առավել ևս, որ այդ թեմայի մասին գիտեն ինչպես Հայաստանում, այդպես էլ Վրաստանում, հատկապես Պրահայում «Կարասին-Աբաշիձե» ձևաչափով ռուս-վրացական հանդիպումից հետո։
Ինչպես հայտնի է, Պրահայում Ռուսաստանի ԱԳՆ ղեկավարի տեղակալ Գրիգորի Կարասինի և Ռուսաստանի հետ փոխհարաբերությունների գծով Վրաստանի վարչապետի հատուկ ներկայացուցիչ Զուրաբ Աբաշիձեի հանդիպումից հետո հայտարարվել էր 2011 թվականին «Առևտրային միջանցքների մասին» կնքած պայմանագրի վերականգնման որոշման մասին։ Այն կողմերին հնարավորություն է տալիս առևտուր անել և տրանսպորտային հաղորդագրություն զարգացնել Աբխազիայի և Հարավային Օսեթիայի միջոցով` չշոշափելով նրանց կարգավիճակի խնդիրը։
Աբխազիայի երկաթուղին Վերին Լարսի այլընտրանքից մեկն է։ Առևտրային միջանցնքների մասին պայմանագրի համաձայն, առևտրային ուղիներից մեկն անցնում է Զուգդիդի-Սոչի երթուղով և Աբխազիայի միջով։ Մյուսը` Նար (Հյուսիսային Օսեթիա)-Գորի։ Այդ միջանցքն անցնում է Հարավային Օսեթիայի միջով։
Ամեն ինչ լավ կլիներ, սակայն այդ համաձայնագրի իրականացման համար վրացական կողմը պետք է առնվազն փոփոխություններ մտցնի երկրի Սահմանադրության, ինչպես նաև 2008 թվականի օգոստոսից հետո ընդունված «օկուպացված տարածքների մասին» օրենքի մեջ։ Իսկ այդ օրենքը նույնիսկ նշված հաղորդակցման միջոցների գործարկման պարագայում թույլ չի տալիս Վրաստանի տարածքով միջազգային առևտուր իրականացնել։
Վրացական ընդդիմությանն այսօր պատասխանեց Վրաստանի փոխվարչապետ, էներգետիկայի և բնական պաշարների նախարար Կախա Կալաձեն։
«Հայաստանի վարչապետի հետ հանդիպման ժամանակ Աբխազիայի երկթագծի հարցը չի քննարկվել։ Ընդդիմությունը ստում է։ Նույնիսկ ակնարկ չի եղել Աբխազիայի տարածքով երկաթուղային հողարդակցման գործարկման վերաբերյալ»,- լրագրողների հետ զրույցում ասել է Կալաձեն։
Նրա խոսքով` վրացական ընդդիմության հայտարարությունները աբսուրդային և պրովոկացիոն որակելուց բացի, այլ կերպ անվանել հնարավոր չէ։ Վրաստանի և Հայաստանի փորձագետները հակված են այն կարծիքին, որ Լարսի այլընտրանք ասելով, Կարապետյանը նկատի ուներ Վրաստանից Ռուսաստան լաստանավային փոխադրումը։
