ԵՐԵՎԱՆ, 24 փետրվարի — Sputnik, Լաուրա Սարգսյան. Հայաստանի վարչապետ Կարեն Կարապետյանը վրացի գործընկերոջ հետ պայմանավորվել է Վերին Լարսի ճանապարհին այլընտրանք գտնելու հարցում։ Այդ մասին նա հայտնել է լրագրողների հետ զրույցում։
«Եթե Ձեզ հետաքրքրում է՝ արդյո՞ք լինելու է Լարսի ճանապարհի այլընտրանք, ապա վստահեցնում եմ Ձեզ, որ այո, լինելու է։ Մնացածի մասին կխոսենք հետագայում, փակագծերը դեռ չեմ բացում։ Մենք պայմանավորվածություն ձեռք բերեցինք ինչպես Լարսի հարցի վերաբերյալ, այնպես էլ էներգետիկ միջանցքի»,- ասել է Կարապետյանը։
Հայաստանի վարչապետն իր այցն արդյունավետ, ջերմ և կոնստրուկտիվ է համարել և նշել, որ ամբողջովին իրականացրել է այն ծրագիրը, որով Վրաստան էր այցելել։ Կողմերը համաձայնության են եկել, որ հայ-վրացական հարաբերություններն անհրաժեշտ է ուսումնասիրել տարածաշրջանային համատեքստում՝ երկու երկրների հնարավորությունների կիրառմամբ։
«Այն ժառանգությունը, որը մենք ունենք, անհրաժեշտ է պահպանել և փոխանցել հետագա սերունդներին։ Այսօր մենք համոզված չենք, որ նրանք կկարողանան պահպանել այն հարաբերությունները, որոնք մենք ունենք։ Այդ իսկ պատճառով պետք է աջակցենք դրան»,- ասել է Կարապետյանը։
Երկու երկրների վարչապետները բանակցությունների շրջանակներում քննարկեցին նաև Վրաստանում բնակվող հայերի հետ կապված իրավիճակը։ Ինչ վերաբերում է Հայաստանին, ապա 20-30 տարի հետո Կարապետյանն այն տեսնում է որպես մի երկիր, որով հպարտանալու են բոլորը։
Առավոտվանից հայ պատվիրակության ներկայացուցիչները ՀՀ վարչապետ Կարեն Կարապետյանի գլխավորությամբ այցելեցին Հայ Առաքելական «Սուրբ Գևորգ» և «Սուրբ Էջմիածին» եկեղեցիները։ Հայկական պատվիրակությանը դիմավորեն Հայ Առաքելական եկեղեցու վիրահայոց թեմի հոգևոր առաջնորդ եպիսկոպոս Վազգեն Միրզախանյանը։
Հայաստանից ժամանած հյուրերը մոմեր վառեցին «Սուրբ Գևորգ» եկեղեցում և ծաղիկներ դրեցին եկեղեցու բակում հանգչող հայտնի հայ գործարարների շիրիմներին։
