ԵՐԵՎԱՆ, 25 փետրվարի — Sputnik. ՀՀ վարչապետ Կարեն Կարապետյանի գլխավորությամբ հայկական պատվիրակության այցը փորձագետներն արդեն հասցրել են ջերմ անվանել, իսկ այցի արդյունքները` հերթական կարևոր քայլ՝ հայ-վրացական հարաբերությունների խորացման համար:
«Նման բարեբեր այցեր հաճախ չեն լինում: Վարչապետների նման փոխհարաբերությունները կարող են լավ օրինակ դառնալ մյուս գերատեսչությունների ղեկավարների համար», — «Երևան-Թբիլիսի» տեսակամուրջի ժամանակ ասաց Վրաստանում Տարածաշրջանային անվտանգության կովկասյան ինստիտուտի տնօրեն Ալեքսանդր Ռուսեցկին։
Նրա խոսքով` անհրաժեշտ է նաև հետագայում դիվերսիֆիկացնել տարածաշրջանային համատեքստում կարևորություն ունեցող տարբեր հայ-վրացական ծրագրերի իրականացումը:
Հայաստանի և Վրաստանի երկկողմ հարաբերություններն անհրաժեշտ է ուսումնասիրել այնպիսի տարածաշրջանային խաղացողների հարաբերությունների համատեքստում, ինչպեսինն են Ռուսաստանը, Իրանը: Նրանք կապված են քաղաքական խնդիրներով, հետևաբար, հարաբերությունների առաջխաղացումն, առկա գլոբալ խնդիրներն անտեսելով, անհնար է: Այս տեսակետին են հակված նաև Երևանում:
Հայաստանի պետական կառավարման ակադեմիայի Տարածաշրջանային հետազոտությունների կենտրոնի գիտաշխատող, Վրաստանի հարցերով փորձագետ Ջոնի Մելիքյանը կարևոր և նշանակալի է համարում Վրաստան հայկական պատվիրակության այցը, քանի որ վերջին ժամանակներում նման բան պաշտոնական մակարդակում չի եղել։
«Կառավարության ղեկավարների մակարդակով վերջին շրջանում պաշտոնական այցեր մեզ մոտ քիչ են եղել: Պետք էր հաղորդել այն «դրայվը», որը կարևոր է հայ-վրացական հարաբերությունների մեջ», — «Երևան-Թբիլիսի» տեսակամուրջի ժամանակ ասել է Մելիքյանը:
Փորձագետը նշեց, որ այսօրվա դրությամբ երկու երկրների միջև տարածաշրջանային նշանակության մի քանի ենթակառուցվածքային նախագիծ է իրականացվում էներգետիկայի ոլորտում: Սակայն փոխգործակցության խորացման համար անհրաժեշտ է միջանձնային շփումը կառավարությունների ղեկավարների, նախագահների մակարդակով:
«Կապը հաստատվեց, այցը` հաջողվեց», — եզրափակեց Մելիքյանը:
Կարեն Կարապետյանը վարչապետի պաշտոնում առաջին անգամ այցելեց Վրաստան: Վարչապետի գլխավորությամբ հայկական պատվիրակության կազմում ընդգրկվել էին նաև Հայաստանի կառավարության ներկայացուցիչներ, այդ թվում առողջապահության նախարար Լևոն Ալթունյանը, մշակույթի նախարար Արմեն Ամիրյանը, գյուղատնտեսության նախարար Իգնատի Առաքելյանը, տրանսպորտի, կապի և տեղեկատվական տեխնոլոգիաների նախարար Վահան Մարտիրոսյանը, տնտեսական զարգացումների և ներդրումների նախարար Սուրեն Կարայանը և էներգետիկ ենթակառուցվածքների և բնական պաշարների նախարար Աշոտ Մանուկյանը:
Վրաստանն ու Հայաստանը դիվանագիտական հարաբերություններ են հաստատել 1992 թվականի հուլիսից: Երկրները համագործակցում են առևտրի, տրանսպորտի, էներգետիկայի և զբոսաշրջության ոլորտներում:
Դիվանագիտական հարաբերությունների 24 տարիների ընթացքում Հայաստանն ու Վրաստանը միջազգային բնույթի 88 փաստաթուղթ են ստորագրել առևտրի, արտադրողի սեփականության իրավունքների պաշտպանության, հոգեմետ նյութերի և թմրանյութերի ապօրինի շրջանառության դեմ պայքարի և այլ ոլորտներում:
