ԵՐԵՎԱՆ, 24 փետրվարի — Sputnik, Լաուրա Սարգսյան. Վրաստանի վարչապետ Գեորգի Կվիրիկաշվիլին վարչապետ Կարեն Կարապետյանի գլխավորությամբ հայկական պատվիրակությանը պաշտոնական ընթրիքի հրավիրեց:
«Վարչապետները «Ճոպանուղի» հասան տրամվայի վագոններով»,- գրված է Վրաստանի վարչապետ Գեորգի Կվիրիկաշվիլու Ֆեյսբուքյան էջում:
Կվիրիկաշվիլին փորձել է եղբայրական հարևան Հայաստանից ժամանած գործընկերոջը ցույց տալ քաղաքի ամենատեսարժան վայրերը` Մթածմինդա (Սուրբ լեռ) լեռան բարձրությունից բացվող Թբիլիսիի բնապատկերը: Ամենայն հավանականությամբ, երկու երկրների կառավարության ղեկավարները ընթրել են լեռան վրա գտնվող ռեստորաններից մեկում, կամ էլ այցելել են Վրաստանի նախկին վարչապետ Բիձինա Իվանիշվիլուն, որի նստավայրը նույնպես այդ վայրերում է գտնվում:
Կարապետյանը ժամանել է Վրաստան երկօրյա այցով՝ չորեքշաբթի: Հայաստանի կառավարական պատվիրակության ողջույնի պաշտոնական արարողությունը տեղի է ունեցել Թբիլիսիում գտնվող Վրաստանի կառավարության շենքում:
