ԵՐԵՎԱՆ, 22 փետրվարի — Sputnik. Ռուսաստանը կողմ է ԼՂ հակամարտության փոխընդունելի լուծմանը՝ վերջին տարիներին Հայաստանի, Ադրբեջանի նախագահների և ԵԱՀԿ ՄԽ համանախագահների ստորագրած փաստաթղթերի շրջանակներում: Այս մասին այսօր Մոսկվայում, ՀՀ և ՌԴ ԱԳ նախարարների համատեղ ասուլիսում հայտարարեց Ռուսաստանի արտաքին գերատեսչության ղեկավար Սերգեյ Լավրովը:
«Վստահ եմ, որ առաջիկայում բանակցությունները նպաստելու են բարիդրացիական և գործընկերային հարաբերությունների զարգացմանը»,- ասաց Լավրովը:
Հայաստանի արտգործնախարար Էդվարդ Նալբանդյանը նշեց, որ հանդիպման ընթացքում դարձյալ ընդգծվել է 1994-95թթ հրադադարի պայմանագրի և անցյալ տարի Վիեննայում և Սանկտ-Պետերբուրգում ձեռք բերված պայմանավորվածությունների պահպանման անհրաժեշտությունը:
«Մենք Սերգեյ Վիկտորովիչի հետ համակարծիք ենք, որ ուժի կիրառումն անընդունելի է և վնասում է խաղաղ կարգավորմանը»,- ասաց Էդուարդ Նալբանդյանը՝ հավելելով, որ մենք բարձր ենք գնահատում Ռուսաստանի և մյուս համանախագահ երկրների բացառապես խաղաղ կարգավորմանն ուղղված ջանքերը:
Պատասխանելով բանակցությունների ընթացքն ու ձևաչափը փոխելու Բաքվի ջանքերի մասին լրագրողների հարցին` Սերգեյ Լավրովը նշեց, որ ԵԱՀԿ ՄԽ համանախագահների ներկայիս ձևաչափն այլընտրանք չունի: «Հօգուտ այս տարբերակի բազմիցս արտահայտվել են նաև Ադրբեջանի և Հայաստանի նախագահները այն փաստաթղթերում, որտեղ դրված են նրանց ստորագրությունները»,- ասաց ՌԴ ԱԳ նախարարը:
Անդրադառնալով հակամարտության կարգավորման շուրջ Ադրբեջանի դիրքորոշմանը՝ Էդուարդ Նալբանդյանը հիշեցրեց ադրբեջանցի դիվերսանտի դիակը վերադարձնելու վերջին փորձը, երբ, Հայաստանի տարածքում 3 զինծառայողների սպանած դիվերսանտին դին ստանալով, Ադրբեջանը պնդում էր, որ նա դիվերսանտ չէ և ժխտում էր անցյալ տարեվերջին դիվերսիոն գործողություններ իրականացնելու փաստը:
«Իսկ երբ դիակը վերադարձվեց Ադրբեջանին, այդ երկրի նախագահի հատուկ հրամանագրով նա հռչակվեց ազգային հերոս: Ընդ որում, ձևակերպումը շատ հետաքրքիր է, դրանում ասված է` հանձնարարության հաջող իրականացման համար: «Այսինքն՝ հանձնարարել են դիվերսիա իրականացնել և դրա համար հռչակել են ազգային հերոս»,- ասաց Նալբանդյանը:
Ինչ վերաբերում է ադրբեջանական կողմի հայտարարություններին, թե հայկական կողմը պարտավոր էր վերադարձնել ադրբեջանցու դին մարդասիրական նորմերից դրդված` Էդուարդ Նալբանդյանը նշեց. «Ի՞նչ մարդասիրության մասին է խոսքը, երբ տարիներ առաջ, երբ հայ հովիվը մառախուղի պատճառով մոլորվել ու հասել էր Ադրբեջան, գերի էր ընկել, նրան տանջում և տեսախցիկների առաջ հարցաքննում էին, իսկ վերջում սպանեցին՝ ներկայացնելով, թե, իբր, ինքնասպանություն է գործել: Մեկ այլ դեպքում էլի գերուն սպանեցին ու հայտարարեցին, թե սրտի անբավարարություն ուներ:
Դե, իսկ ապրիլյան իրադարձությունների ընթացքում գերի ընկած զինվորներին ոչ միայն տանջում էին, այլև գլխատում և հատված գլուխները տանում գյուղերում ու քաղաքներում՝ ցուցադրելու: Իսկ դա անող անձինք հետո պարգևատրում էին նախագահի կողմից: Այդ մասին կան վկայություններ, որոնք տարածվում էին նույնիսկ սոցիալական կայքերում: Ես չեմ խոսում արդեն այն դեպքի մասին, երբ խոցված ուղղաթիռի անկման վայրը օրեր շարունակ պահվում էր ուղիղ կրակահերթի տակ՝ թույլ չտալով անձնակազմի զոհված կամ գուցե դեռ կենդանի մնացած, վիրավոր անդամների դուրսբերումը»,- ասաց Նալբանդյանը:
ՀՀ ԱԳ նախարարը հայտարարեց նաև, որ Ադրբեջանը պարբերաբար խախտում է հակամարտության ողջ ընթացքում ձեռք բերված բոլոր պայմանավորվածությունները: «Բայց մենք այլընտրանք չունենք և շարունակելու ենք մեր քայլերը՝ համանախագահների հետ միասին հակամարտության կարգավորման և առաջին հերթին կարգավորման գործընթացի առաջխաղացմանն ուղղությամբ»,- ասաց նա:
ՀՀ ԱԳ նախարարը նաև հայտարարեց, որ Սերգեյ Լավրովի հետ մոսկովյան հանդիպման հիմնական թեման եղել է ՀՀ նախագահի ՌԴ պաշտոնական այցի նախապատրաստումը: Հանդիպման ընթացքում քննարկվել են նաև տարածաշրջանային և միջազգային խնդիրներ: Առիթից օգտվելով` Էդուարդ Նալբանդյանը շնորհակալություն հայտնեց վերջին ամսվա ընթացքում 2 անգամ Հայաստանից հումանիտար օգնությունը ռուսական զինուժի միջոցով Սիրիա հասցնելու համար:
