ԵՐԵՎԱՆ, 19 փետրվարի — Sputnik, Նելլի Դանիելյան. Եթե եղանակը կտրուկ տաքանա, Երևանին ջրհեղեղ է սպառնում: Sputnik Արմենիայի հետ զրույցում նման կարծիք հայտնեց Հայկական աշխարհագրական ընկերության փոխնախագահ, ԵՊՀ աշխարհագրության և երկրաբանության ֆակուլտետի ֆիզիկական աշխարհագրության և ջրաօդերևութաբանության ամբիոնի վարիչ Թրահել Վարդանյանը։
«Եթե տաքանա, անմիջապես վտանգը շատ մեծ է: Բացի այն, որ քաղաքից դուրս հալոցքի ջուրը կարող է հեղեղատներով՝ Ջրվեժի կողմից և Գետառով գալ, Երևանի ներսում էլ ձյունը մաքրված, տարհանված չէ: Դա էլ տեղում կհալվի և ավելի մեծ վտանգ կստեղծի»,- ասաց Վարդանյանը:
Միաժամանակ, մասնագետի խոսքով, Երևանի ջրատար համակարգը՝ կոյուղին, չափազանց փոքր տարողունակություն ունի, և եթե անգամ գործի ամբողջ կարողությամբ, այս ծավալի ջուր տեղափոխել չի կարող:
Երևանի բնական հեղեղատար համարվող Գետառը, որը տարիներ առաջ, հակառակ մասնագետների նախազգուշացումների, կառուցապատվեց, ևս անկարող կլինի մեղմել հնարավոր հեղեղումների հետևանքները:
Վարդանյանը նշեց, որ խորհրդային տարիներին հսկայական աշխատանք էր արվել, կառուցվել էին Երևանի սելավատար և սելավընդունիչ համակարգեր, որոնցից այսօր շատ քիչ բան է մնացել:
«Ավան-Առինջում փոքր լիճ էր կառուցվել, որտեղ պետք է կուտակվեին ջրերը: Նաև փոքր ջրանցք էր կառուցվել, որ այդ ջրերը պետք է Ավան-Առինջից տեղափոխեր մինչև Հրազդան գետը: Սակայն այսօր այդ տարածքների մի մասը բնակեցված է, մի մասը ծածկված է շինարարական աղբով: Ջրատարն ընդհանրապես գոյություն չունի»,- ասաց նա:
Մասնագետի համոզմամբ, եթե այս համակարգը գործեր, Երևանին սպառնացող հեղեղման վտանգն ընդամենը 2-3% կկազմեր, բայց ներկա պայմաններում մնում է հուսալ, որ մայրաքաղաքում ու հարակից տարածքում կուտակված ձյունը միանգամից չի հալվի: Հակառակ դեպքում՝ ջրհեղեղը Երևանում անխուսափելի է:
ՀՀ ԱԻՆ Երևանի փրկարարական վարչության փրկարար ուժերի համակարգման բաժնի պետ, վարչության պետի տեղակալ փ/ծ մայոր Դավիթ Գրիգորյանն այս տեսակետը չի կիսում: Երևանում ջրհեղեղի հնարավորությունը, հակառակ գիտնականի, նա քիչ հավանական է համարում: ԱԻՆ ներկայացուցչի կարծիքով՝ մայրաքաղաքում ու դրա շրջակայքում տեղացած առատ ձյունը միանգամից չի հալվի, և քաղաքի սելավատար համակարգը կհասցնի հեռացնել հալոցքից առաջացած ջուրը: Բացի այդ, ըստ նրա, Երևանի աշխարհագրական դիրքն էլ ջրհեղեղի համար վտանգավոր չէ:
![Давид Григорян Давид Григорян - Sputnik Արմենիա](https://cdn.am.sputniknews.ru/img/630/34/6303443_0:0:1600:1065_600x0_80_0_0_2b53b9242772896c3791905a819634ef.jpg)
Իսկ եթե անգամ լինեն անսպասելի իրավիճակներ, ԱԻՆ-ն ունի անհրաժեշտ տեխնիկան՝ մայրաքաղաքի փողոցները ողողած ջուրը հավաքելու համար:
«Առատ անձրևների դեպքում մենք ունենք պոմպեր, որոնցով կարողանում ենք հեռացնել ջուրը, թե նման դեպք է լինում: Շարժական պոմպեր ունենք, որոնք մեքենաներով մոտենում են և հեռացնում ջրերը»,- ասաց փրկարար ծառայության սպան:
Նշենք, որ նախօրեին ՀՀ ԱԻՆ Հիդրոմետ ծառայության օդերևութաբանության կենտրոնի պետ Գագիկ Սուրենյանը հայտնել է, որ տաք օդային հոսանքներն արդեն Հայաստան են տեղաշարժվում Աֆրիկայի շրջաններից:
Առայժմ հայտնի չէ այդ հոսանքների ներթափանցման օրն ու ջերմաստիճանի բարձրացման չափը, բայց մոտ ապագայում պարզ կլինի՝ գիտնականի կանխատեսումն է իրատեսական, թե ԱԻՆ ներկայայացուցչի: