ԵՐԵՎԱՆ, 18 փետրվարի — Sputnik. Աֆրիկայի շրջաններից դեպի Հայաստան են տեղաշարժվում տաք օդային հոսանքներ: Այս մասին հայտնում է Գագիկ Սուրենյանը:
«Շատ շուտով ձեզ կավետենք գարնան գալուստը: Ըստ նախնական կանխատեսումների՝ դեպի Հայաստան Աֆրիկայի շրջաններից արդեն տեղաշարժվում են տաք օդային հոսանքներ: Հիմա ճշտում ենք դրա ներթափանցման օրն ու ջերմաստիճանի բարձրացման չափը, որի մասին լրացուցիչ կտեղեկացնենք»,- գրել է Սուրենյանը:
Սուրենյանն ավելի վաղ մեկ այլ գրառում էր կատարել՝ նշելով, որ փետրվարի 17-ի լույս 18-ի գիշերը հանրապետության տարածքում դիտվել է խիստ ցածր ջերմային ֆոն, և օդի ջերմաստիճանը Աշոցքում հասել է —30, Ծաղկահովտում —28, Գավառում, Գյումրիում, Ապարանում, Վարդենիսում —26-ից —27, Սիսիանում, Տաշիրում, Ամասիայում, Հրազդանում, Մարտունիում, Շորժայում —23-ից —24, Արարատյան դաշտում —18-ից —22 աստիճանի»,- գրել է Սուրենյանը:
Այս գիշեր օդի միջին օրական ջերմաստիճանը կլիմայական նորմայից ցածր է եղել 10-15 աստիճանով:
