ԵՐԵՎԱՆ, 8 փետրվարի — Sputnik. Լապշինի գործը դեռ երկար կտևի, միջազգային մակարդակով մեծ աղմուկ կբարձրացնի, կհասնի մինչև մարդու իրավունքների եվրոպական դատարան ու եվրոպական կառույցներ: Այս տեսակետից այն կարող է համեմատվել Բուդապեշտում հայ սպա Գուրգեն Մարգարյանի սպանության գործի դատավարության հետ: Նման կարծիք Sputnik Արմենիայի հետ զրույցում հայտնեց միջազգային իրավունքի մասնագետ Արա Ղազարյանը:
«Քանի դեռ Լապշինը գտնվում էր Բելառուսում, գործն ավելի շատ ՄԱԿ-ի տիրույթում էր և ոչ թե ԵԽ-ի ՄԻԵԴ-ի, քանի որ Բելառուսը ԵԽ անդամ չէ»,- ասաց Ղազարյանը,- «Բայց հենց որ Լապշինը հայտնվեց Ադրբեջանում, այն տեղափոխվեց արդեն ԵԽ տիրույթ: Իսկ այստեղ կան արդեն բազմաթիվ քաղաքական մարմիններ, որոնք այսպես թե այնպես անդրադառնալու են այս գործին»:
Հայ իրավաբանները ոչ միայն ուշադիր հետևում են իրադարձությունների զարգացմանը, այլև բելառուս գործընկերների հետ արդեն իսկ այս հարցով դիմել են Մարդու իրավունքների կոմիտե՝ պահանջելով կասեցնել Լապշինի արտահանձնումը: Իսկ արտահանձնումից հետո արդեն մտադիր են համատեղ դիմել նաև եվրոպական կառույցներին: Արա Ղազարյանը չի բացառում, որ երբ գործը հասնի ՄԻԵԴ՝ Հայաստանն ու հայ իրավաբանները հանդես կգան որպես երրորդ կողմ:
Արա Ղազարյանի խոսքով՝ Լապշինի գործը, թեև Ադրբեջանի ներքին աուդիտորիայի համար հաղթանակ կարող է ընկալվել, բայց արտաքին մարտահրավերների տեսանկյունից այդ երկրի իշխանությունների համար գլխացավանքի է վերածվելու: «Գալու է մի ժամանակ, որ Ադրբեջանը մտածի, թե ինչպես այս գործից պրծնի»,- կարծում է իրավաբանը:
Ինչ վերաբերում է Լապշինին առաջադրված մեղադրանքին, դրանք Արա Ղազարյանի խոսքով, իրավաչափ չեն և միջազգային իրավունքից չեն բխում: «Եթե որևէ մեկը հրապարակավ քննադատում է որևէ պետության քաղաքականությունը կամ ընդունում է Ղարաբաղի անկախությունը, դա չի կարող մեկնաբանվել որպես սեպարատիզմի կոչ, որպես ազգային անվտանգության կամ սահմանադրական կարգի դեմ ուղղված հանցագործություն»,- ասաց Ղազարյանը՝ հավելելով, որ եթե ժամանակակից աշխարհում քննադատություններն այս տեսակետից մեկնաբանվեն, կվերանան և՛ լրագրողներ, և ՛ քաղաքական մեկնաբանները, և՛ փորձագետները: Սա, նրա բնորոշմամբ «լուրջ մարտահրավեր է եվրոպական կարգի դեմ»:
Արա Ղազարյանը նշում է, որ Լապշինի գործը ուղղակի ազատ խոսքի դեմ ոտնձգություն է և գտնվում է ոչ թե իրավական, այլ քաղաքական դաշտում: Ուստի Եվրոպան չի կարող այս հարցի վրա աչք փակել:
Իրավաբանը նաև համոզված է, որ Լապշինի գործը չի կարող նախադեպ դառնալ Ադրբեջանի համար՝ պատժելու իր համար անցանկալի այլ անձանց ևս:
«Նախադեպ չի դառնա, որովհետև Ադրբեջանը պետք է գտնի այնպիսի ավտորիտար գործընկեր, ինչպիսին Բելառուսն է: ԵԽ անդամ պետություններն այս հարցով Ադրբեջանի հետ չեն համագործակցի, որովհետև դա եվրոպական արժեքների դեմ ոտնձգություն է»,- ասում է Ղազարյանը:
Մեր հիշեցմանը, թե Արցախ այցելած ցանկացած լրագրող, որ Լապշինի պես ներառված է Ադրբեջանի սև ցուցակում, կարող է նույն ճակատագրին արժանանալ, Արա Ղազարյանն արձագանքեց. «Դրա համար պետք է մեծ դիմադրություն լինի, Եվրոպան դատապարտի այս երևույթը, որպեսզի այն էլ ավելի չտարածվի»: Իսկ որ դա տեղի է ունենալու մեր զրուցակիցը չի կասկածում:
