ԵՐԵՎԱՆ, 8 փետրվարի — Sputnik. Բլոգեր Ալեքսանդր Լապշինի հանձնումը կեղտոտ գործարք է, ասաց հայկական խորհրդարանի փոխխոսնակ, բարեկամության հայ-բելառուսական խորհրդարանական խմբի համանախագահ Էդուարդ Շարմազանովը։
Նրա խոսքով` երկու պետությունների միջև իրականացրած կեղտոտ գործարքը մարդու իրավունքի, խոսքի ազատության, ազատ տեղաշարժի և այլ ժողովրդավարական արժեքների խախտում է։
«Սա քայլ է, որը բնորոշ չէ ժողովրդավարական ռեժիմին։ Քայլ է, որը հակասում է հայ-բելառուսական հարաբերություններին»,- ասաց Շարմազանովը։
Նա իմաստ չի գտնում քննարկելու այդ հարցը բարեկամության խորհրդարանական խմբի սեղանի շուրջ, քանի որ դա համագործակցության հարթակ է։ Շարմազանովը նշեց, որ ընդ որում՝ Հայաստանը կիրառել է բոլոր միջոցները Լապշինի հանձնումը թույլ չտալու համար։
Լապշինին ձերբակալել են Բելառուսում՝ 2016 թվականի դեկտեմբերին, Ադրբեջանի հայցով, որտեղ նրան միջազգային հետախուզում էին հայտարարել մի շարք խախտումների համար, մասնավորապես, Լեռնային Ղարաբաղ այցելելու պատճառով։
Բելառուսի Գերագույն դատարանը չի բավարարել ռուս-իսրայելացի բլոգեր Ալեքսանդր Լապշինի բողոքը` նրան Բաքվին չհանձնելու վերաբերյալ։
