ԵՐԵՎԱՆ, 8 փետրվարի — Sputnik, Նելլի Դանիելյան. Ադրբեջանի սև ցուցակը, որում ներառված են բոլոր այն անձինք, որոնք այցելել են ԼՂՀ, Ադրբեջանի ԱԳՆ-ը վերջին անգամ թարմացրել և վերահրապարակել է 2016 թ. դեկտեմբերի 7-ին:
Դրանում 623 մարդ կա, որոնցից 180-ը լրագրող է, հիմնականում՝ Ռուսաստանից և Ուկրաինայից: Բայց Ադրբեջանի իշխանությունների ուշադրությունն այս պահին առավելապես սևեռված է ինդոնեզական «Տեմպո» պարբերականի լրագրող Ֆամեգա Պուտրիի վրա: Երիտասարդ լագրողը 2016թ-ի հոկտեմբերին եղել է ՀՀ-ում և ԼՂՀ-ում ու իր տպավորությունները ներկայացրել «Տեմպո» ամսագրում:
«Դարեր շարունակ Լեռնային Ղարաբաղը կռվախնձոր է եղել հայ քրիստոնյաների և Թուրքիայի ու Պարսկաստանի հովանավորությունը վայելող մահմեդականների միջև: Առաջին համաշխարհային պատերազմից հետո Խորհրդային Միությունը Լեռնային Ղարաբաղը ինքնավար մարզի կարգավիճակով միացրեց Ադրբեջանին, թեև Լեռնային Ղարաբաղի բնակչության մեծամասնությունը հայերն էին կազմում: 1980¬ականների վերջին ԼՂԻՄ մարզային խորհուրդը Հայաստանի հետ վերամիավորվելու ցանկությունն արտահայտող որոշում ընդունեց, իսկ որոշ ժամանակ անց հռչակվեց Լեռնային Ղարաբաղի անկախությունը: Այս ամենին հաջորդած պատերազմին զոհ գնացին տասնյակ հազարավոր մարդիկ, հարյուր հազարավորներն էլ դարձան փախստական»,- իր հովածում գրել է ինդոնեզացի լրագողը:
Նա նաև ներկայացրել է ԼՂՀ-ում իր տեսածն ու վերապրածը. «Ստեփանակերտում բնականոն կյանք է եռում. խանութները լի են ֆիրմային հագուստներով, քաղաքի շուկան՝ թարմ մրգերով, իսկ Ստեփանակերտի դպրոցներ հաճախող կենսախինդ երեխաները ողջունում են ինձ: Ստեփանակերտի մաքուր և կոկիկ կենտրոնն իր լայն պողոտաներով ու մայթերով հիշեցնում է եվրոպական քաղաք, սակայն, ի տարբերություն եվրոպական քաղաքների, Ստեփանակերտի փողոցներով քայլում են երիտասարդ զինվորներ: Եթե ինդոնեզական Աչեհում ամեն կիլոմետրի վրա անձի ինքնությունը ստուգող կետեր են տեղակայված, Ստեփանակերտում նման կետեր չկան: Եվ թեև փողոցներում զինվորները շատ են, նրանց մեծ մասը զենք չի կրում»:
Հոդվածն, ակնհայտորեն, չեն հավանել Ադբեջանում: 2016թ-ի դեկտեմբերին այդ երկրի ԱԳՆ-ն պաշտոնապես հայտարարել էր, որ ուսումնասիրում են Ֆամեգա Պուտրիի՝ Լեռնային Ղարաբաղ այցելելու հարցը:
Համաձայն Ադրբեջանի սև ցուցակի, Լեռնային Ղարաբաղ առավելապես այցելում են Ռուսաստանի, Գերմանիայի, Ֆրանսիայի, Իտալիայի և ԱՄՆ-ի քաղաքացիները:
Ադրբեջանի համար անցանկալի անձանց ցուցակում են նաև Ֆրանսիայի ներքին գործերի նախարար Բրունո Լե Ռուն, որը Ֆրանսիայի խորհրդարանի պատգամավորի կարգավիճակով 2015թ. սեպտեմբերին այցելել էր Արցախ:
Ադրբեջանը persona non grata է հայտարարել նաև ՌԴ շուրջ 3 տասնյակ անձի, որոնց թվում է ՙԷխո Մոսկվի՚ ռադիոկայանի լրագրող Սերգեյ Բուտմանը, ՌԴ պետդումայի պատգամավորներ Ռոման Բատալովը, Կոնստանտին Զատուլինը, Տատյանա Վոլոժինսկայան, Քաղաքական և ռազմական հետազոտույունների ինստիտուտի միջազգային հարաբերությունների բաժնի պետ, ճանաչված վերլուծաբան Սերգեյ Մարկեդոնովը, Ռազմավարական մշակույթի հիմնադրամի փորձագետ Անդրեյ Արեշեվը և այլք:
Ցուցակում ներառված են նաև մի շարք երկրների և ԵԽ պատգամավորներ, քաղաքական գործիչներ, գիտնականներ ու արվեստագետներ:
Սև ցուցակը եզրափակում են օպերային աշխարհահռչակ երգչուհիներ Մոնսերատ Կաբալիեն ու Լյուբով Կազարնովսկայան:
