ԵՐԵՎԱՆ, 6 փետրվարի — Sputnik, Նելլի Դանիելյան. ԵԱՏՄ անդամ երկրների ընկերություններ, մասնավորապես՝ ռուսաստանյան, մասնակցել են ՀՀ պետական գնումների մրցույթներին: Հայաստանյան ընկերությունները, սակայն, ԵԱՏՄ երկրներում անցկացվող պետգնումների մրցույթներին չեն մասնակցում:
Անդրադառնալով պատճառներին՝ Ֆինանսների նախարար Վարդեն Արամյանը նշեց, որ հիմնական խնդիրը «մասշտաբի էֆեկտն» է: Բանն այն է, որ պետգնումների մրցույթին մասնակցելու իրավունք ստանալու համար տնտեսվարող ընկերությունը պետք է որոշակի փորձառություն ունենա և ապահովի անհրաժեշտ շրջանառություն:
«Մեր տնտեսվարողների շրջանառությունը մի քանի անգամ ցածր է ՌԴ միջին տնտեսվարողի շրջանառությունից: Սա խոչընդոտ է և հատուկ է բոլոր փոքր տնտեսություններին»,- ասաց նախարարը: Փոխարենը, նույն պատճառով, մեծ երկրների բիզնեսն էլ Հայատանով առանձնապես հետաքրքրված չէ. պետ գնումների ծավալը մեր երկրում այնքան չէ, որ գայթակղի մեծ տնտեսություն ունեցողներին:
Ֆինանսների նախարարը չբացառեց, որ կառավարության առաջիկա նիստում գործադիրը կվերանայի պետական գնումների գործընթացում ԵԱՏՄ երկրներին տրված առավելությունը:
