ԵՐԵՎԱՆ, 20 սեպտեմբերի — Sputnik. ԵԱՏՄ տնտեսական հանձնաժողովի արդյունաբերական քաղաքականության դեպարտամենտի տնօրեն Նիկոլայ Կուշնյարյովը հայտարարել էր, թե 2017 թվականից Եվրասիական միությունում արտադրված ապրանքները կարող են մակնշավորվել «Պատրաստված է ԵՏՄ-ում» տարբերանշանով:
Էկոնոմիկայի նախարարությունն այսօր Երևանում կազմակերպել էր «Արտադրված է Հայաստանում» ցուցահանդես, որի ժամանակ լրագրողները ՀՀ փոխվարչապետ, միջազգային տնտեսական ինտեգրման և բարեփոխումների նախարար Վաչե Գաբրիելյանից հետաքրքրվեցին, արդյո՞ք իրատեսական է, որ հայաստանյան արտադրանքն առաջիկայում կրի ՙարտադրված է ԵԱՏՄ-ում՚ տարբերանշանը: Վաչե Գաբրիելյանի մեկնաբանմամբ, այդ առաջարկն այսօր նախաձեռնության մակարդակի վրա է, որևէ որոշում դեռ չի կայացվել:
«Նման որոշում չկա և առայժմ մենք նման համաձայնություն չենք տվել: Եթե հարցն առաջադրվի, կքննարկենք»,- ասաց Գաբրիելյանը
Հայաստանի Գործատուների միության նախագահ Գագիկ Մակարյանը Sputnik Արմենիայի հետ զրույցում ռուսական կողմի այս նախաձեռնությունը հավանական է համարում՝ հավելելով, որ Ռուսաստանը փորձում է աշխարհին ներկայանալու նոր՝ միասնական, մոդել ձևավորել:
Նման նախաձեռնությունը, սակայն, Մակարյանի կարծիքով, Հայաստանի համար վտանգավոր կարող է լինել, քանի որ Հայաստանը դրանով կկորցնի իր ինտեգրման հնարվորությունը միջազգային շուկայում: Ինչ վերաբերում է «Արտադրված է Հայաստանում» բրենդին, ՀՀ փոխվարչապետը չի թաքցնում, որ այն աշխարհում շատ մեծ ճանաչում չունի, սակայն, որոշ երկրներում ՀՀ-ում արտադրված ապրանքն արդեն ճանաչելի է:
«Արտադրված է Հայաստանում» բրենդը տարբեր երկրներում յուրովի է ընկալվում»,- ասաց Գաբրիելյանը,-«Ես չեմ կարող ասել, որ մեծ ճանաչում ունի ԱՄՆ-ում, սակայն նախկին ԽՍՀՄ տարածքում ըստ ապրանքների կարելի է դատողություններ անել: Օրինակ, Թուրքմենիայում խիստ հարգի է երևանյան ոսկին, այլ տեղերում կոնյակը, գյուղմթերը, ճշգրիտ մեքենաշինությունը: Դա կախված է կոնկրետ ապրանքից ու կոնկրետ ապրանքային շուկայից»:
Գագիկ Մակարյանի կարծիքով էլ, հայաստանյան արտադրանքն աշխարհում մեծ ճանաչում չունի, քանի որ ակտիվ ինտեգրված չէ միջազգային շուկաներին և առավելապես կողմնորոշված է դեպի ռուսական շուկա:
Ինչ վերաբերում է կառավարության ձեռնարկած քայլերին, այդ թվում՝ պարբերաբար կազմակերպվող հայկական արտադրանքի ցուցադրություններին, Գագիկ Մակարյանը դրանք բավարար չի համարում:
«Դրանց մասնակցում են մարդիկ, որոնք այս պահին Հայաստանում են՝ զբոսաշրջիկներ, դիվանագիտական ներկայացուցիչներ: Դրսից շատ քիչ մարդիկ են գալիս հատուկ այդ նպատակով, որ լսեն ՙԱրտադրված է Հայաստանում՚ բրենդի մսին: Բացի այդ, ցուցահանդեսում 300 ձեռնարկություն է ներկայացված, բայց մոտ 30-40-ն են խոշոր ընկերություններ, որոնք ավելի շատ ներսում են սպառվում, քան դրսում և ավելի շատ պետք է տուրիզմի զարգացման դեպքում իրենց շուկաները գտնեն»,- ասաց Մակարյանը:
