ԵՐԵՎԱՆ, 25 հունվարի-Sputnik. Ջեբրաիլի շրջան գոյություն չունի, նախ այսպես սկսեց զրույցը Արցախի Հանրապետության նախագահի մամուլի խոսնակ Դավիթ Բաբայանը։ Ջեբրաիլը խորհրդային շրջանում եղել է Ադրբեջանի կազմում, իսկ 1993 թվականին հայկական զինված ուժերն ազատագրել են վաղեմի արցախյան տարածքը։ Այժմ այն ԼՂՀ Հադրութի շրջանի մի մասն է։ Նախկին Ջեբրաիլի շրջանից միայն փոքրիկ կտոր է մնացել Ադրբեջանին, այդ հատվածում է Չոջուկ Մարջանլին, որը շփման գծից 4 կմ հեռավորության վրա է։
Ադրբեջանի փոխվարչապետ, փախստականների և բռնի տեղահանվածներով կոմիտեի նախագահ Ալի Հասանովն ասել է, որ իրենք պատրաստվում են տներ ու դպրոց կառուցել Չոջուկ Մարջանլիում։ Նրա խոսքով` դա հնարավոր է եղել Լելեթեպեն գրավելուց հետո։
«Եթե նրանք իսկապես ցանկանում են այնտեղ բնակավայր կառուցել, ապա թող այդ բնակավայրում ապրի Ալիևի որդին, պաշտպանության նախարարի ընտանիքը, այլ ոչ թե այնտեղ գցեն խեղճուկրակ մարդկանց, որոնք տունուտեղ չունեն, այս ծրագիրն անհասկանալի նպատակներ է հետապնդում»,- ասաց Դավիթ Բաբայանը։
Տեղեկացնենք, որ ադրբեջանական լրատվամիջոցները, կատարելով պետական պատվերը, լուրեր են տարածում, իբր ապրիլյան զինված գործողություններից հետո իրենք տասնյակ հազարավոր հա տարածքներ են գրավել։
«Սա կատարյալ ապատեղեկատվություն է, նրանք էլ սա պատմության մեջ կմտցնեն որպես ալիևյան հաղթանակ, որը լրիվ անիմաստ կլինի իր էությամբ։ Իսկ ինչ վերաբերում է Լելեթեպեին, այն անցել է նրանց վերահսկողության տակ, բայց գերիշխող դիրք չի գրավում։ Մենք ռազմավարական նշանակություն ունեցող այլ կարևոր բարձունքներ ունենք»,- ասաց Բաբայանը։
Իսկ այդ բարձունքին, Բաբայանի խոսքով, Ադրբեջանը հասավ 4 օրում 4 հազար մարդու կորստով։ Բաբայանի խոսքով` Ադրբեջանում ներքին իրավիճակն այնքան է բարդացել, որ որոշել են այս կերպ սփոփել ժողովրդի բարոյալքված վիճակը։
