ԵՐԵՎԱՆ, 25 հունվարի — Sputnik. Ալեքսանդր Լապշինը բողոքարկել է Բելառուսի գլխավոր դատախազության որոշումը, որի համաձայն` բլոգերին պետք է արտահանձնեն ադրբեջանական կողմին։ Այս մասին հայտնում է Sputnik Բելառուսը` հղում անելով Մինսկի քաղաքային դատարանին։
«Լապշինի բողոքը հասել է Մինսկի քաղաքային դատարան», — Sputnik-ին է հայտնել Մինսկի քաղաքային դատարանի նախագահի օգնական Անաստասիա Շիլվյանը։
Նրա խոսքով` բողոքը կուսումնասիրվի հունվարի 26-ին Մինսկի քաղաքային դատարանում ժամը 14:00։ Նիստը փակ կլինի։
Իրավիճակին ծանոթ աղբյուրները հայտնում են, որ նրան պաշտպանում են իսրայելցի և ռուս փաստաբանները։ Բելառուսի օրենսդրության համաձայն` նա կարող է նաև բողոքով դիմել Բելառուսի Գերագույն դատարան։
Ավելի վաղ տեղեկացրել էինք, որ բլոգերը նամակ է գրել Ադրբեջանի նախագահ Իլհամ Ալիևին և ներողություն խնդրել անձնական վիրավորանք հասցնելու համար, երկրի ղեկավարությանը նման խնդրանքով է դիմել նաև բլոգերի մայրը, որը բնակվում է Իսրայելում։
ՌԴ և Իսրայելի քաղաքացի Ալեքսանդր Լապշինը, որը բնակվում է Մոսկվայում և վարում է հեղինակավոր Travel Blog-ը, ձերբակալվել էր 2016 թվականի դեկտեմբերի 15-ին Մինսկում:
2011 թվականի ապրիլին, 2012 թվականի հոկտեմբերին և 2016 թվականի հունիսին Լապշինն այցելել էր Լեռնային Ղարաբաղ և այդ մասին գրել իր բլոգում՝ քննադատելով Ադրբեջանի քաղաքականությունը, ինչի համար Ադրբեջանի իշխանությունները նրա նկատմամբ քրեական գործ էին հարուցել և հետախուզում հայտարարել՝ Ադրբեջանի պետական սահմանն անօրինական հատելու մեղադրանքով: Ադրբեջանը դիմել է Բելառուսին՝ Լապշինին արտահանձնելու պահանջով:
