ԵՐԵՎԱՆ, 9 մայիսի — Sputnik. Գյուղն այսօր մարտական վիճակում է, մարտական ոգով, իսկ գյուղի բոլոր երիտասարդներն էլ դեռ ապրիլյան գործողությունների ժամանակ են կամավոր անդամագրվել, որ դիրքեր գնան, ասում է Հադրութի շրջանի Մոխրենես համայնքի ղեկավար Ալիկ Ավագյանը:
«Ինչպես մյուս գյուղերի, այնպես էլ մեր գյուղի երիտասարդների կեսն այս պահին առաջնագծում է, իսկ մյուս կեսը` գյուղում, սպասում է իր հերթափոխին։ Մարտական ենք տրամադրված, ինչպես որ պետքն է»,- վստահեցնում է նա ու պատմում քառօրյա պատերազմում զոհված երիտասարդներից մեկի` 29-ամյա Ազնաուր Բալայանի մասին։
Ազնաուրը 90-ականների պատերազմում զոհված ազատամարտիկի որդի էր, այս տարվա ապրիլի քառօրյա պատերազմի առաջին զոհերից մեկը։ Հոր վրեժը սրտում`երազում էր հայոց բանակում ծառայելու ու հետախույզ դառնալու մասին։
«Մարտական գործողությունների ժամանակ նա իր զինակիցների հետ հերոսություն կատարեց, կարելի է ասել` նրանք թշնամու մի քանի ջոկատ ջախջախեցին, որի ընթացքում ինքն էլ զոհվեց, երկու ընկերներն էլ»,- պատմում է համայնքի ղեկավարը։
Ազնավուրը մի եղբայր ու մի քույր ունի ։ Եղբայրը բնակվում է Մոխրենեսում, իսկ քույրն ամուսնացած է, բնակվում է Հադրութի շրջանի Թաղասեր գյուղում։
189 բնակիչ ունեցող Մոխրենես գյուղում բոլորը երազում են, որ Ղարաբաղն անկախ պետություն ճանաչվի։ Համայնքի ղեկավարը վստահ է` վաղ թե ուշ դա էլ կլինի, պարզապես ժամանակ է պետք։ Իսկ հիմա պետք է պայքարել հայրենիքի ամեն թիզ հողի համար։ Ինքը` 90-ականների զինվորականը, գյուղի ջոկի, հետո արդեն վաշտի հրամանատարը, լավ գիտի` ինչ է զինվոր լինելը ու բոլոր զինվորներին, անկախ նրանից՝ որտեղ են նրանք ծառայում, ցանկանում է, որ տարվա մեջ ունենան այնպիսի մի օր, որ իրենք իրենց հաղթանակի օրը նշեն:
