ԵՐԵՎԱՆ, 23 հունվարի — Sputnik, Լաուրա Սարգսյան. Հայաստանի յուրաքանչյուր քաղաքացի կարող է իր տանը տեղադրել ֆոտովոլտային արևային վահանակ և այդպիսով ստանալ էլեկտրաէներգիայի այլընտրանքային աղբյուր։ Էներգետիկայի և բնական պաշարների նախարարությունում պնդում են, որ արևային մարտկոցների գները մատչելի են։
«Սկզբից պետք է դիմել սարքավորումը տրամադրողին։ Մասնագետները կզննեն տունը` պարզելու համար, թե համապատասխանում է այն սարքը տեղադրելու պայմաններին ու կանոններին և եզրակացություն կտան», — Sputnik Արմենիայի թղթակցի հետ զրույցում ասաց էներգետիկայի և բնական պաշարների փոխնախարար Հայկ Հարությունյանը։
Դրական եզրակացության դեպքում, մասնագետների ջոկատն անհրաժեշտ հաշվարկներ է կատարում և գնահատում էլեկտրաէներգիա սպառելու ամսական նորման, որին համապատասխան որոշվում է տեղադրվող սարքի հզորությունը։ Նախարարությունում պնդում են, որ ամեն ինչ արել են, որպեսզի մարտկոցները հասանելի լինեն երկրի քաղաքացիների համար։ Մասնավորապես, արևային մարտկոցը կարելի է տեղադրել առանց կանխավճարի, իսկ մասնագետների ծառայությունների և հենց սարքի համար կարելի է վճարել փուլ առ փուլ։
Արևային վահանակները լիարժեք շահագործելուց առաջ պետք է փոխարինել դասական հաշվիչները ռևերսային հաշվիչով։ Այդ հաշվիչը ֆիքսում է, թե որքան էներգիա եք արտադրում, կիրառում կամ տալիս էլեկտրականությունը «Հայաստանի էլեկտրական ցանցեր» ՓԲԸ-ին։ Այդ տվյալներն ամեն ամիս ամրագրվում են էլեկտրաէներգիա ստանալու և հանձնելու մասին ակտի ստորագրմամբ։
«Եթե դուք ավելի շատ եք վերցրել «ՀԷՑ»-ից, ապա համապատասխանաբար ավելի շատ եք վճարում, եթե հակառակը, ապա տարբերությունը ծածկում է «ՀԷՑ»-ը», — ասաց Հարությունյանը։ Նրա խոսքով` Հայաստանում բոլոր նախադրյալները կան` ամբողջությամբ այլընտրանքային էներգիայի օգտագործմանն անցնելու համար։ Դրան նպաստում են նաև օդի մաքրությունը, տարվա մեջ արևային օրերի քանակը, ծովի մակարդակից բարձրությունը։ Փոխնախարարը նշեց, որ մեզանից յուրաքանչյուրը կարող է իր տան տանիքին տեղադրել 150 կվտ հզորությամբ էլեկտրակայաններ և արտադրել էլեկտրաէներգիա, որի ավելցուկը կարող է վաճառել «ՀԷՑ»-ին։
Հարությունյանը կոչ արեց չձգձգել այլընտրանքային աղբյուրին անցնելը։ Նա առաջիններից մեկն է իր տան տանիքին տեղադրել արևային մարտկոցը։ Կառավարությունը նախատեսում է մինչև 2020 թ-ը կրճատել էներգիայի սպառումը 38 տոկոսով և դրա հետ կապված` էներգետիկ ծախսերը։ Հայաստանում ստեղծված են բոլոր պայմաններն` արևային էլեկտրակայաններ տեղադրելու համար։ Ոչ միայն արտոնագիր չի պահանջվում, այլ նաև ամբողջ գործընթացն ազատված է հարկերից։ Նաև ստեղծված են բոլոր պայմաններն այդ ոլորտում ներդրումներ անելու համար։
Տվյալ պահին նախատեսվում է Հայաստանում կառուցել վեց էլեկտրակայան` Թալին քաղաքում, Գագարին, Մեծ Մասրիկ, Դաշտադեմ և Մերձավան գյուղերում։
Նախագիծը դեկտեմբերի 29-ին հաստատվել է Հայաստանի կառավարության կողմից, տրամադրվել է 129 միլիոն դոլար։ Այս և այլ հարցեր կքննարկվեն «Էլեկտրաէներգիայի շաբաթ 2017» խոշոր միջազգային էներգետիկ միջոցառման ժամանակ, որին կմասնակցեն շուրջ 300 ներկայացուցիչներ` 30 արտասահմանյան ընկերություններից։
