ԵՐԵՎԱՆ, 23 հունվարի — Sputnik. Մեծամորի ատոմակայանն այս պահին աշխատում է սովորական ռեժիմով, խափանումների պատճառները վերացվել են, անհանգստանալու պատճառ չկա, լրագրողների հետ զրույցում ասաց ՀՀ էներգետիկայի և բնական ռեսուրսների նախարարի տեղակալ Հայկ Հարությունյանը։
«Իրականում բարձրավոլտ էլեկտրակայանների ցանցերի գծերի վրա առաջացած սովորական խնդիր էր: Այն առաջացել էր սառույցների կուտակումից: Այդ դեպքը ցույց տվեց, որ ատոմակայանի պաշտպանական համակարգերն աշխատում են: Կարճ ժամանակում խնդիրը վերացվել է, համակարգային ոչ մի վթար չի եղել: Ուզում եմ կրկին շեշտել՝ դա ատոմակայանի խնդիր չէր»,-ասաց Հայկ Հարությունյանը:
Նրա խոսքով` սա ևս մեկ անգամ ցույց տվեց, որ Հայաստանը պատրաստ է վերացնել այն բոլոր հնարավոր խնդիրները, որոնք կապված են ԱԷԿ-ի աշխատանքի հետ։ Գործողությունների պլան է մշակվել վթարային ցանկացած իրավիճակի դեպքում։
Ավելի վաղ տեղեկացրել էինք, որ հունվարի 21-ին, բարձրավոլտ (110 կՎ) էլեկտրահաղորդման գծերում վթարային անջատման հետևանքով աշխատել է ատոմակայանի 110 կՎ առաջին հաղորդաձողերի դիֆերենցիալ պաշտպանությունը: Արդյունքում 110 կՎ երկրորդ հաղորդաձողերի դիֆերենցիալ պաշտպանությամբ ամբողջությամբ հոսանքազրկվել է ՀԱԷԿ-ի 110 կՎ-ի ենթակայանը և առաջին բլոկի էլեկտրասնուցումը։ Էլեկտրաէներգետիկական համակարգի օպերատորի հրահանգով բեռնավորվել է Հրազդանի ՋԷԿ-ի 3-րդ էներգաբլոկը: Հայաստանի և Վրաստանի միջև գործող «Վթարային իրավիճակներում էլեկտրաէներգիայի մատակարարման» միջկառավարական պայմանագրի համաձայն` էլեկտրաէներգիայի պակասորդը մատակարարվել է Վրաստանից:
«Բարձրավոլտ էլեկտրական ցանցերի» անձնակազմի ջանքերով վթարը հայտնաբերվել ու վերացվել է, և էլեկտրահաղորդումը վերականգնվել է:
Ներկա պահին ԱԷԿ-ը գործում է ամբողջ ծավալով, էներգամատակարարումն իրականացվում է լիարժեք ռեժիմով։
Հայկական ԱԷԿ-ը գտնվում է Արարատյան դաշտավայրում, Երևանից 28 կմ դեպի արևմուտք: ՀԱԷԿ-ը երկու էներգաբլոկ ունի, որոնք կառուցվել են ВВЭР-440 տեսակի երկու սեյսմիկ ռեակտորների հիման վրա: Առաջին էներգաբլոկը շահագործման է հանձնվել 1976 թվականի դեկտեմբերի 22-ին, երկրորդը` 1980 թվականի հունվարի 5-ին:
Ներկա պահին աշխատում է ատոմակայանի երկրորդ էներգաբլոկը, որը վերագործարկվել է 1995 թվականի նոյեմբերի 5-ին: Այն արտադրում է հանրապետությունում սպառվող էլեկտրաէներգիայի 40 տոկոսը:
Հայաստանի կառավարության որոշման համաձայն` 2015 թվականին մեկնարկել են կայանի ծառայության ժամկետի երկարացման աշխատանքները։
