ԵՐԵՎԱՆ, 17 հունվարի — Sputnik. ՌԴ արտգործնախարար Սերգեյ Լավրովն այսօր, 2016թ-ի ամփոփիչ ասուլիսի ժամանակ հայտարարել է, որ դեմ է ռուս բլոգեր Ալեքսանդր Լապշինի արտահանձնմանն Ադրբեջանին, դեմ է նաև նրա դեմ հարուցված քրեական գործով առաջադրված մեղադրանքին:
«Մենք դեմ ենք լրագրողի կամ մասնավոր անձանց կողմից այս կամ այն տարածաշրջանում այս կամ այն տարածքն այցելության քրեականացմանը: Մենք դեմ ենք նաև նրան, որ այս կամ այն երկրում ձերբակալված ՌԴ քաղաքացիները արտահանձնվեն երրորդ երկիր: Մենք հյուպատոսի միջոցով կապվել ենք պարոն Լապշինի հետ: Գիտենք, որ նա միաժամանակ Իսրայելի քաղաքացի է և իսրայելացի դիվանագետները ևս նրա հետ կապի մեջ են եղել»,- ասել է Լավրովը՝ հավելելով, որ ՌԴ քաղաքացու իրավունքները պետք է հարգվեն:
2016 թվականի դեկտեմբերի 15-ին Մինսկում ձերբակալվել էր ՌԴ և Իսրայելի քաղաքացի Ալեքսանդր Լապշինը, ով բնակվում է Մոսկվայում և վարում հեղինակավոր Travel Blog-ը:
2011 թվականի ապրիլին, 2012 թվականի հոկտեմբերին և 2016 թվականի հունիսին Լապշինն այցելել էր Լեռնային Ղարաբաղ և այդ մասին հրապարակումներ արել իր բլոգում՝ քննադատելով Ադրբեջանի քաղաքականությունը, ինչի համար Ադրբեջանի իշխանությունները նրա նկատմամբ քրեական գործ էին հարուցել և հետախուզում հայտարարել՝ Ադրբեջանի պետական սահմանն անօրինական հատելու մեղադրանքով:
Այժմ Ադրբեջանը դիմել է Բելառուսին՝ Լապշինին արտահանձնելու պահանջով:
