ԵՐԵՎԱՆ, 16 հունվարի — Sputnik. ՀՅԴ Հայաստանի երիտասարդական միության և ՀՅԴ «Նիկոլ Աղբալյան» ուսանողական միության անդամներն այսօր, Երևանում` Բելառուսի դեսպանատան մոտ, բողոքի ակցիա են իրականացրել՝ Բելառուսի իշխանություններից պահանջելով տուրք չտալ Ադրբեջանի քաղաքականությանը:
«Ադրբեջանն իրավունք չունի պահանջելու, որպեսզի այլ երկրի քաղաքացու արտահանձնեն իրեն»,- ասաց ՀՅԴ ՀԵՄ անդամ Սևակ Նազարյանը՝ հավելելով, որ նման քայլը կարող է շատ ավելի վատ հետևանքների հանգեցնել:
Բողոքի ակցիայի մասնակիցները նամակ հանձնեցին ՀՀ-ում Բելառուսի արտակարգ և լիազոր դեսպան Իգոր Նազարուկին:
Արցախ այցելելու համար Իսրայելի և Ռուսաստանի քաղաքացիություն ունեցող բլոգեր Ալեքսանդր Լապշինը շուրջ 1 ամիս առաջ՝ 2016թ-ի դեկտեմբերի 15-ին, Մինսկում, Ադրբեջանի հարցումով կալանավորվել էր: Ադրբեջանի իշխանությունները քրեական գործ են հարուցել Լապշինի նկատմամբ Ադրբեջանի քրեական օրենսգրքի երկու հոդվածով՝ «Ադրբեջանի պետական սահմանի անօրինական հատում» և «Պետության դեմ ուղղված հրապարակային կոչեր»: Պատճառը 2011-ին և 2012-ին նրա այցելություններն են Լեռնային Ղարաբաղի Հանրապետություն:
Ալեքսանդր Լապշինը 2011 թ-ից ներառված է Ադրբեջանի անցանկալի անձանց ցուցակում: Այժմ Ադրբեջանը Բելառուսից պահանջում է արտահանձնել Ալեքսանդր Լապշինին:
Բելառուսի գլխավոր դատախազն էլ օրերս հայտնել է, որ ուսումնասիրում է Ադրբեջանի պահանջը:
Ի դեպ, Լրագրողների պաշտպանության կոմիտեն այսօր նույնպես Բելառուսի իշխանություններին հորդորել է անհապաղ ազատ արձակել բլոգեր Ալեքսանդր Լապշինին:
Լրագրողների պաշտպանության կոմիտեի տվյալներով` Ադրբեջանը Լեռնային Ղարաբաղ այցելելու համար անցանկալի անձ է հայտարարել 180 լրագրողի:
