«Ժողովուրդ». Հարձակման փորձ նախագահի դեմ
Թերթի տեղեկություններով` նախագահ Սարգսյանի դեմ հարձակման փորձ է կատարվել։
«Մեզ լուրեր հասան այն մասին, որ ԱԱԾ կողմից այդ ծրագրի բացահայտումից հետո ուժեղացվել է Բաղրամյան 26-ի և առհասարակ Սերժ Սարգսյանի անվտանգության հսկողությունը։
ՀՀ պետական պահպանության ծառայության պետ Հրաչյա Հարությունյանը «Ժողովուրդ» օրաթերթի հետ զրույցում, խոսելով այս մասին, ասաց.
«Ուղղակի մենք մեր գործառույթներն իրականացնում ենք ամբողջ ծավալով։ Մեկին կարող է դա դուր չգալ, բայց մենք նորմալ մեր աշխատանքային պրոցեսն իրականացնում ենք»։ Ի դեպ, հետաքրքիրն այն է, որ Սերժ Սարգսյանն այս տարի հունվարի 5-ին անսպասելի մեկնեց արձակուրդ։ Պաշտոնական արարողակարգի համաձայն` երկրի նախագահը և մյուս բարձրաստիճան պաշտոնյաները հունվարի 6-ին Էջմիածնում մասնակցում են Սուրբ ծննդի պատարագին, մինչդեռ այս տարի Սարգսյանը ներկա չէր։ Շրջանառվող լուրերի համաձայն` նրա անսպասելի արձակուրդը կապված է առողջական խնդիրների հետ։ Իսկ գուցե նրան մեկուսացրել են` հնարավոր վտանգը չեզոքացնելու համար»,-գրում է թերթը։
«Չորրորդ իշխանություն». Նազարյանը Քոչարյանի հետ
Երևանի նախկին ոստիկանապետ, այժմ ԱԻՆ փրկարար ծառայության փոխտնօրեն Ներսիկ Նազարյանն օրերս լրատվամիջոցներից մեկի հետ զրույցում չէր հերքել, որ Ամանորին եղել է ԱՄՆ-ում։
««ՉԻ»-ին այդ ուղևորության մասին հետաքրքիր մանրամասներ են հայտնի դարձել, մասնավորապես, նա ԱՄՆ էր մեկնել Փարիզով։ Իսկ Երևան-Փարիզ չվերթի ընթացքում օդանավում նա հանդիպել է Ռոբերտ Քոչարյանին։ Ականատեսներից մեկի պատմելով` չվերթի ամբողջ ընթացքում Ներսիկ Նազարյանն ու Ռոբերտ Քոչարյանն անդադար զրուցել ու ինչ-որ հարցեր են քննարկել։ Նրանց զրույցի բովանդակությունը, սակայն, մեզ ճշտել չհաջողվեց»,-գրում է թերթը։
«Հայկական ժամանակ». «Փող են տալու»
Թերթի տեղեկություններով` Հայաստանի կառավարությունը հույս ունի, որ այս տարվա ընթացքում «ռուսական ծագման» առնվազն 300 միլիոն դոլարի օտարերկրյա ներդրում է իրականացվելու Հայաստանում։
«Մեր աղբյուրների պնդմամբ` այսպիսի քաղաքական որոշում է կայացվել Ռուսաստանի Դաշնության իշխանական վերնախավում, և դրա նպատակը Կարեն Կարապետյանի կառավարությանն աջակցություն ցուցաբերելն է։ Այս աջակցության շնորհիվ Կարապետյանի դիրքերը Հայաաստանի իշխանության մեջ և հանրության աչքում պետք է ամրապնդվեն»,-գրում է թերթը։
«Ժամանակ». «Խայտառակ վատ»
Թերթի տեղեկություններով` նախագահական նստավայրում խորը հիասթափված են վարչապետ Կարեն Կարապետյանի ասուլիսից։
«Թե՛ նախագահի աշխատակազմի ղեկավար Արմեն Գևորգյանը, թե՛ նրա առաջին տեղակալ Ալեքսան Հարությունյանը վարչապետին առաջարկել են պատրաստվել ասուլիսին, սակայն Կարեն Կարապետյանը մերժել է նրանց օգնությունը։ Արդյունքում իշխանության տարբեր ներկայացուցիչներ, այդ թվում` նախարարներ, վարչապետի ասուլիսը գնահատում են խայտառակ չստացված։ Ի տարբերություն վարչապետի ասուլիսի, պաշտպանության նախարար Վիգեն Սարգսյանի` Հանրային հեռուստաընկերությանը տված հարցազրույցը, օրինակ, ոչ միայն մի քանի անգամ ամբողջությամբ և հատվածներով ներառվեց Հանրայինի տարբեր եթերաժամերում, այլև ժրաջանորեն տարածվում է սոցցանցերում»,- գրում թերթը։
«Հայկական ժամանակ». «Որ չվնասի»
Թերթին տեղեկություններ են հասել, որ Ռոբերտ Քոչարյանը հիմնականում ԱՄՆ-ում է բնակվում։ Մամուլի հրապարակումների համաձայն` նա այնտեղ շքեղ առանձնատուն է գնել և կյանքի մեծ մասն ընտանիքով այնտեղ է անցկացնում։
«Կարծիք կա, որ նա Հայաստանից մեկնել է հատկապես այն պատճառով, որպեսզի ցույց տա, թե ընդհանրապես չի խառնվում ներքաղաքական և նախընտրական գործընթացներին»,-գրում է թերթը։
