ԵՐԵՎԱՆ, 17 հունվարի — Sputnik. Գագիկ Ծառուկյանի` քաղաքականություն վերադառնալու թեման տևական ժամանակ քննարկվում է հասարակության և քաղաքական շրջանակներում։ Այսօր նա հայտարարություն է տարածել և հաստատել, որ վերադառնում է քաղաքականություն և մասնակցելու է ԱԺ առաջիկա ընտրություններին։
«Ես զերծ կմնայի քաղաքական գործընթացներին մասնակցելուց, եթե տեսնեի ու վստահ լինեի, որ մեր երկիրը ընթանում է ճիշտ ճանապարհով, տնտեսությունը զարգանում է, որ ժողովրդի բարեկեցության մակարդակը բարձրանում է: Ցավոք, ունենք մեծ չափերի հասնող արտագաղթ, թույլ ու հիվանդ տնտեսություն, աղքատության անընդհատ աճ, բարձր չափերի հասնող գործազրկություն և ապագայի նկատմամբ անվստահություն»,- նշել է Ծառուկյանը:
Նա հայտնել է, որ չի կարող անտարբեր լինել իր ժողովրդի ճակատագրի հանդեպ՝ հատկապես, որ յուրաքանչյուր օր նրան են դիմում հազարավոր քաղաքացիներ՝ հորդորելով վերադառնալ քաղաքականություն:
«Ինձ են դիմում «Բարգավաճ Հայաստանի» իմ կուսակից ընկերները, որոնց հետ ես երկար ճանապարհ եմ անցել, ինձ են դիմում բազմաթիվ կուսակցությունների և հասարակական կազմակերպությունների ներկայացուցիչներ, ովքեր համոզված են, որ իմ վերադարձը կօգնի շտկելու այս ծանր իրավիճակը: Վերջին ամիսներին բազմաթիվ հանդիպումներ եմ ունեցել նաև Սփյուռքի հասարակական-քաղաքական, գործարար շրջանակների և մտավորականության ներկայացուցիչների հետ, որոնք ևս ինձ հորդորում են վերադառնալ քաղաքականություն»,- ասել է Ծառուկյանը։
Ըստ նրա` 2017 թվականի խորհրդարանական ընտրությունները ճակատագրական են լինելու Հայաստանի ապագայի համար:
«Նկատի ունենալով մեր երկրի առջև ծառացած ներքին և արտաքին մարտահրավերները, ինչպես նաև իմ քաղաքականություն վերադառնալու հանրային պահանջը, ես հայտարարում եմ, որ բացում եմ քաղաքական գործունեության փակված էջը և մասնակցելու եմ 2017 թվականի խորհրդարանական ընտրություններին՝ ձևավորելով լայն դաշինք: Մեր դռները բաց են բոլոր այն քաղաքական ուժերի և գործիչների առաջ, ովքեր մտահոգ են մեր երկրի ապագայով:
Մենք կարող ենք, մենք ունենք այդ ներքին մեծ ներուժը՝ մեր երկրի զարգացման և հզորացման համար»,- ասել է Ծառուկյանը:
Նա նշել է, որ ժողովրդի առջև պարտք ունի կատարելու:
«Կյանքիս այս կարևոր որոշումը իմ խաչն է, որը կրելու եմ մինչև վերջ՝ հանուն Հայաստանի և հայ ժողովրդի»,- եզրափակել է Ծառուկյանը:
