ԵՐԵՎԱՆ, 17 հունվարի — Sputnik. Շվեյցարական Դավոսում այսօր մեկնարկում է ամենամյա հեղինակավոր տնտեսական 47-րդ ֆորումը, որին մասնակցում են աշխարհի 30 երկրների ղեկավարներ, 70 երկրների քաղաքական էլիտայի, գործարար աշխարհի ներկայացուցիչներ, առաջավոր տնտեսական վերլուծաբաններ ու լրագրողներ:
Ֆորումի այս տարվա ուշադրության կենտրոնում են լինելու միջազգային տնտեսական խնդիրները, ՏՏ ահաբեկչութան ու կոռուպցիայի դեմ պայքարը, էներգետիկայի ապագան ու մեծ բիզնեսի վաղվա օրը՝ գլոբալ աշխարհում տեղի ունեցող փոփոխությունների համատեքստում:
Համաշխարհային տնտեսության ամենակարևոր միջոցառումներից մեկը համարվող դավոսյան համաժողովին Հայաստանն այս տարի ևս չի ներկայանա: Մեր երկիրն արդեն շուրջ 10 տարի դուրս է մնացել համաշխարհային տնտեսական այս իրադարձությունից:
«Դավոսում ներկայանում են տնտեսական շատ ավելի մեծ դերակատարում ունեցող երկրները, և, իհարկե, դա նաև իր ազդեցությունն է թողնում, որ Հայաստանը դուրս մնա նմանօրինակ խոշոր համաժողովներից»,- Sputnik Արմենիայի հետ զրույցում, անդրադառնալով Հայաստանի չմասնակցության խնդրին, նշեց տնտեսագետ Վիլեն Խաչատրյանը՝ միաժամանակ չբացառելով, որ մեր երկիրը գուցե և դիմում է, բայց համապատասխան արձագանք չի ստանում նման համաժողովներում ներկայանալու:
«Դավոսից դուրս մնալը Հայաստանի կյանքը դժոխքի չի վերածի»,- համոզված է տնտեսագետը, — «բայց, այնուամենայնիվ, մենք կորցնում ենք մեր դիրքերը խոշոր ծրագրերին մասնակցելու, դրանցում մեր դերակատարումը ներկայացնելու, համաշխարհային տնտեսական հանրության կայացրած որոշումներին ինտեգրվելու տեսանկյունից»:
Մինչդեռ, հակառակ պարագայում, Վիլեն Խաչատրյանի համոզմամբ, համաշխարհային տնտեսության մեջ կայացվող մեծ որոշումներում Հայաստանը կարող է նաև կամուրջ դառնալ երկու երկրների տնտեսական շահերի ու ծրագրերի միջև:
Նման համաժողովները, Վիլեն Խաչատրյանի խոսքով, պայմանագրեր կնքելու, Հայաստանը ներդրումային տարբեր նախագծերում ներկայացնելու, մեր երկրի գրավչությունը բացահայտելու, ճանաչելիությունը բարձրացնելու տեսակետից կարևոր նշանակություն ունեն, որից Հայաստանը, փաստորեն, այս տարի ևս չի օգտվելու:
