ԵՐԵՎԱՆ, 23 սեպտեմբերի — Sputnik. 2016 թվականի ապրիլյան դեպքերը փոխեցին իրավիճակը, սակայն էական ազդեցություն չունեցան Հայաստանի տնտեսության վրա, լրագրողների հետ հանդիպման ժամանակ ասաց ՀՀ էկոնոմիկայի նախարարի ժամանակավոր պաշտոնակատար Արծվիկ Մինասյանը։
«Ադրբեջանին չի հաջողվել ապրիլյան պատերազմով ջարդել Հայաստանի տնտեսության մեջքը», — ասել է Մինասյանը։
Նա նշեց, որ նորանշանակ վարչապետին արդեն ներկայացրել է երկրի տնտեսության բարելավման հիմնական մոտեցումները և նշել հիմնական ուղղությունները` տնտեսական արժեհամակարգի ստեղծում, կառուցվածքային փոփոխություններ, տնտեսական կառուցվածքի ձեռքբերումներին ուղղված մարտավարական աշխատանքներ և միջազգային ու տարածաշրջանային ինտեգրացիայի իր տեսլականը։
«Նախկին վարչապետ հովիկ Աբրահամյանի կառավարության օրոք մենք աշխատում էինք այն ծրագրերի շրջանակում, որոնք հավանության են արժանացել Ազգային ժողովի կողմից։ Ցուցանիշների տեսանկյունից արվել էր հնարավոր ամեն ինչ», — ասաց Մինասյանը։
Նա վստահ է, որ նոր կառավարությունը` Կարեն Կարապետյանի գլխավորությամբ կյանքի կկոչի այն համաձայնագրերը, որոնք հաստատվել էին նախկին կառավարության օրոք։
«Ես` որպես Հայաստանի էկոնոմիկայի նախարարի ժամանակավոր պաշտոնակատար, չեմ խոսում դժվարությունների մասին, այլ փորձում եմ հաղթահարել դրանք։ 2050 թվականին Հայաստանը հինգ միլիոն բնակչություն կունենա, և յուրաքանչյուր քաղաքացու եկամուտը հավասար կլինի եվրոպական երկրների եկամուտներին», — եզրափակեց Մինասյանը։
Նրա խոսքով` եթե հարևան Վրաստանը կարողացավ սահմանափակվել միայն բիզնես հատվածում իրականացրած բարեփոխումներով, Հայաստանն իր առջև կանգնած ներքին և արտաքին մարտահրավերների ու չլուծված հակամարտության պատճառով չի կարող իրեն նման բան թույլ տալ։ Արտաքին մարտահրավերներն ու սպառնալիքները, ինչպես նաև անավարտ պատերազմը, պահանջում են, որ պետությունն ու կառավարությունը պարբերաբար մասնակցություն ունենան տնտեսական ոլորտում։
