ԵՐԵՎԱՆ, 9 հունվարի-Sputnik. Էզոթերիկ տուրիզմը նոր ուղղություն է Հայաստանում: Տուրիստական գործակալություններից մեկի տնօրեն Գուրգեն Հովհաննիսյանի խոսքով՝ այն ներառում է էկոտուրիզմին ու գիտական տուրիզմին բնորոշ տարրեր: Մեր երկրում կան էներգետիկ ակտիվ կետեր, որոնք ուսումնասիրման փուլում են և բարձր արժեք են ներկայացնում:
«Մենք ունենք ինքնաբուխ դուրս եկող ջրերի մի ամբողջ ցանց Հայաստանով մեկ, ունենք հեթանոսական շրջանից մինչև քրիստոնեական շրջանն ընկած կառույցներ, որտեղ շատ ուժեղ էներգետիկ կետեր կան: Օրինակ՝ Գեղարդավանքը, որտեղ այն աստիճան բարձր էներգիաներ են կուտակված, այն այնքան գրագիտությամբ է կառուցված, որ կարելի է ուղղակի ամիսներով ուսումնասիրել, առողջանալ հոգեպես ու ֆիզիկապես»,-ասաց նա:
Նրա խոսքով՝ այդ կետերում կատարում են մեդիտացիոն պրոցեսներ, նկարում են, երգում՝ այսպիսով` ակտիվացնելով շփումը բնության հետ:
«Մի կողմ դնենք կրոնական նախապաշարումները»,-ասաց Հովհաննիսյանը: Նա վստահություն հայտնեց, որ Հայաստանն իր էներգետիկ դաշտով նման է Տիբեթին։
«Նրանք հասել են PR-ային դաշտին, սակայն մենք ոչնչով չենք զիջում այդ վայրերին, այստեղ նույնպես հնարավոր է նման բարձր էներգիաներ ստանալ»,-պարզաբանեց նա:
Նշյալ վայրերի թվին նա դասեց բոլորիս հայտնի Քարահունջը, որն, ըստ բրիտանական գիտնականների, 3500 տարով ավելի հին է, քան Սթոունհենջը: Հայաստանում զարգանում է նաև արտտուրիզմը: Զրուցակիցը հիշեցրեց, որ պատմությանը հայտնի տաղանդավոր նկարիչները պարտադիր կերպով ճամփորդել են: Աշխարհի տարբեր ծայրերում լինելով՝ նրանք նորամուծություններ էին բերում իրենց երկրներ, ներշնչվում այս կամ այն վայրով ու ստեղծագործում:
«Այն մարդիկ, որոնք երկար տարիներ ցանկացել են նկարել, սակայն ինչ-ինչ պատճառներով չի ստացվել, հնարավորություն ունեն ունակությունները բացահայտել, նկարել ու ճանաչել իրենց հայրենիքը նկարչության միջոցով, արտտուրիզմի շնորհիվ»,-պատմեց նա:
Նշյալ գործընթացին զուգահեռ նա ավելացրեց արտփիլիսոփայության երեկոները, որոնք պարտադիր կերպով ներառված են օրակարգում:
