ԵՐԵՎԱՆ, 27 դեկտեմբերի — Sputnik, Լաուրա Սարգսյան. Ավելի քան 300 տարեկան թավջութակ նվագելը երջանկություն և մեծ ձեռքբերում է երաժշտի համար, կարծում է աշխարհահռչակ թավջութակահար Նարեկ Հախնազարյանը։
«Յուրաքանչյուր երաժշտի երազանքն է նվագել, ունենալ իտալացի վարպետ Ջուզեպե Գվարներիի ստեղծած թավջութակը, որը 310 տարեկան է։ Մինչ այդ, այս թավջութակը նվագել է լեգենդար երաժիշտ Յանոշ Ստարկերը»,- ասաց Հախնազարյանը։
Նրա խոսքով` գործիքը նրան տրամադրել է չինացի կոլեկցիոները` վերադարձնելու պայմանով։ Այդպես, նրա մոտ հայտնվել է թավջութակ, որը համապատասխանում է նրա արտիստական և երաժշտական չափանիշներին, որի հետ ավելի հեշտ կլինի նվաճել համաշխարհային բարձունքները։
Ոչ մի գործիք չի համեմատվի հին իտալական գործիքի հետ, հնարավոր է՝ այն պատճառով, որ դրա մեջ կենտրոնացած է այն ստեղծողի և նվագողների էներգետիկան։ Այդ գործիքի յուրահատկությունը նաև արտադրության գաղտնիքի մեջ է, որը հայտնի է միայն իտալացիներին։
Նարեկը երաժշտի համար ամենաբարդը համարում է գաղափարներն ու մտահաղացումներն իրագործելու հնարավորության բացակայությունը։ Չէ՞ որ դրա համար պետք է ունենալ ոչ միայն տաղանդ, այլ նաև լավ գործիք։
«Ես յոթերորդ երկնքում եմ և այսօր սկսում եմ զրոյից ուսումնասիրել իմ թավջութակը», — ասաց Հախնազարյանը։
Նրա համար թավջութակը ոչ միայն գործիք է, այլ, առաջին հերթին՝ հարազատ էակ, ընկեր կամ ընկերուհի, որի անվտանգության համար հյուրախաղերի ժամանակ նա ինքնաթիռի լրացուցիչ տոմս է գնում։
Հախնազարյանի համար անցնող տարվա ամենավառ պահերից մեկը Բուկինգհեմյան պալատում տեղի ունեցած մենահամերգն էր, որին ներկա է եղել արքայազն Չառլզն՝ իր շքախմբով։ Հախնազարյանը հիշեց նաև Մոսկվայում կայացած համերգը ռուս դիրիժոր Վալերի Գերգիևի ղեկավարությամբ։
Նա նշեց նաև Սերգեյ Խաչատրյանի հետ կայացած համերգը Ֆրանսիայի ֆիլհարմոնիայի նոր շենքի ֆանտաստիկ դահլիճում։ Հախնազարյանը 2016թ-ի գլխավոր ձեռքբերումը համարում է այն, որ սերբ կինոռեժիսոր Էմիր Կուստուրիցայի «Ծիր կաթին» ֆիլմի սաունդթրեքերից մեկի կատարողն է։
Սեպտեմբերին ֆիլմը ներկայացվել է Վենետիկի փառատոնում։ Այն այլևս չի մասնակցում մրցույթների, քանի որ ստացել է իր բարձրագույն պարգևը` Չայկովսկու անվան մրցույթի մրցանակը։
Այսօր Վիեննայում բնակվող Նարեկը ժամանել է Երևան, որպեսզի տոնը նշի հարազատների ու մտերիմների հետ միասին։ Սակայն նոր տարում նրան սպասում են նոր բեմեր, նոր ձեռքբերումներ Ամստերդամից մինչև Բեռլին։
Նյութի ռուսերեն տարբերակը
