ԵՐԵՎԱՆ, 19 դեկտեմբերի — Sputnik, Անի Լիպարիտյան. Ամերիկացի երաժիշտ Ռոբին Բալմերը շատ է սիրում Հայաստանը, որն իրեն գրկաբաց ընդունեց։ Նա ամուսնացավ հայուհու հետ, լայն հնարավորություններ ստացավ արվեստը զարգացնելու համար։
Ռոբինը հյուրընկալվել էր Sputnik Արմենիա ռադիոկայան և զարմացրել հայերենի իր իմացությամբ, ինչպես նաև պատմել այն մասին, թե ինչպես է հայտնվել Հայաստանում և ինչով է այժմ զբաղվում այստեղ։
Հայկական հարսանիք
1999-2001 թվականներին Բալմերն ապրում էր Գյումրիում, որից հետո մեկնեց ԱՄՆ։ Հայաստան նա վերադարձավ 2012 թվականին և որոշեց բնակություն հաստատել Երևանում։
«Երևանում եմ արդեն 4,5 տարի, մինչ այդ 1,5 տարի ապրել եմ Գյումրիում։ Ինչու՞ եմ Հայաստանում։ Սիրում եմ հայ ժողովրդին։ Հայաստանում ես իսկապես հանգստանում եմ։ 25 տարի ապրել եմ Լոս Անջելեսում, աշխատել եմ Հոլիվուդում՝ կինեմատոգրաֆիայի ոլորտում։ Վազքը շատ էր, խառնաշփոթ էր տիրում։ Իսկ Հայաստանում` այլ է։ Այստեղ խումբ ունեմ, երաժշտություն եմ ստեղծում, նվագում։ Այստեղ ավելի հանգիստ եմ»,- նշեց երաժիշտը։
Բալմերը պատմեց, որ կնոջ հետ ծանոթացել է Գյումրիում։
«Հանդիպել սկսեցինք արդեն Երևանում և այստեղ էլ ամուսնացանք»,- պատմեց նա։
Առաջին ծանոթությունը Հայաստանի հետ
Երաժիշտը հիշում է Հայաստանի հետ իր առաջին ծանոթությունը։ Մի օր աշխատանքի բերումով Բալմերը ծանոթացավ առաջին հայի հետ։ Լոս Անջելեսի կոնսերվատորիայում էր։
«Ես ծանոթացա տարբեր ազգությունների ուսանողների հետ, նրանցից մեկը հայ էր։ Այն ժամանակ նա ինձ հարցրեց՝ կարո՞ղ է արդյոք փորձեր անցկացնել իմ տանը, և ես համաձայնեցի։ Արդյունքում նա ինձ մոտ մի քանի օր անցկացրեց»,- պատմեց Բալմերը։
Ի նշան երախտագիտության՝ հայ ուսանողը իրեն ապաստան տված երաժշտին, որն այդ ժամանակ այդքան էլ լավ ֆինանսական վիճակում չէր, մթերք բերեց, ինչը շատ զարմացրեց Բալմերին։ Տղան ասաց, որ հայերը միշտ կիսում են հարազատների և բարեկամների հետ կերակուրը։ Եվ հենց այն ժամանակ նա հասկացավ տարբերությունը. ամերիկացիները, Ռոբինի խոսքով, շատ են տարբերվում, իսկ հայերը լուսավոր հոգի ունեն, նրանք շատ բարի են։
Հայ-ամերիկյան
Հայաստանում ապրելու տարիների ընթացքում Բալմերը սովորեց լեզուն և այսօր կարողանում է ազատ շփվել, ճիշտ է՝ մի փոքր ակցենտով։
«Լեզուն սկսեցի ուսումնասիրել դեռ Գյումրիում։ Երբ այնտեղ էի ապրում, ընդամենը երեք բառ գիտեի. «Բարև», «Այո», «Ոչ»։ Սակայն շատ դժվար էր, ես խանութներում չէի կարողանում բացատրել ուզածս, ամենուրեք հետս գրպանի բառարան էի ման ածում, որպեսզի գոնե վաճառողներին բացատրեմ, թե ինչ եմ ուզում»,- ասաց նա։
Այսօր Ռոբինը հաղորդակցվելու հետ կապված խնդիրներ չունի, նա լավ խոսում է հայերեն, Robin Fate Alchemy իր խմբի հետ միասին նվագում է տարբեր փաբերում, հաստատություններում, գումար է աշխատում, որի մի մասը մեծ սիրով ուղղում է կարիքավոր հայ ընտանիքներին և երեխաներին։
