ԵՐԵՎԱՆ, 24 դեկտեմբերի — Sputnik. Ահաբեկչության սպառնալիքի մակարդակը Ֆրանսիայում նախկինի պես շարունակում է չափազանց բարձր մնալ, Բեռլինի ահաբակչությունը՝ վկայություն, Journal du Dimanche թերթին տված հարցազրույցում հայտնել է երկրի ազգային ոստիկանության ղեկավար Ժան-Մարկ Ֆալկոնը, հայտնում է ՌԻԱ Նովոստին:
Դեկտեմբերի կեսին, պահպանվող ահաբեկչության վտանգի պատճառով, Ֆրանսիայի խորհրդարանը հավանություն է տվել երկրում արտակարգ իրավիճակի ռեժիմի երկարաձգմանը մինչև 2017 թվականի հուլիս: ԱԻ ռեժիմը մտցվել էր Ֆրանսիայի տարածքում կառավարության որոշմամբ, Ֆրանսիայի նախագահ Ֆրանսուա Օլանդի առաջարկով, անցյալ տարվա նոյեմբերի 13-ի ահաբեկչությունից հետո:
«Մեր հետախուզական ծառայություններն ամեն օր վերլուծում են ահաբեկչության սպառնալիքը:
Ֆրանսիայում այն շարունակում է բարձր մնալ, ինչպես և եվրոպական մյուս երկրներում, որոնք մտնում են միջազգային կոալիցիայի կազմի մեջ: Բեռլինի հարձակումը հաստատում է, որ մարդկանց զանգվածային կուտակումների վայրերում անհրաժեշտ է ձեռնարկել անվտանգության խիստ միջոցներ` միաժամանակ ակտիվ և պասիվ բնույթի», — հայտնել է Ֆալկոնն՝ ի պատասխան Բեռլինի ահաբեկչությունից հետո Ֆրանսիայում ահաբեկչական սպառնալիքի մակարդակը գերագնահատելու մասին հարցին:
Ֆալկոնի խոսքով` ԳԴՀ-ում տեղի ունեցած ողբերգությունը հիշեցրեց մարզպետներին, որ անհրաժեշտ է համոզվել, որ ձեռնարկվել են պաշտպանության բոլոր միջոցները տոնական միջոցառումների, ամանորյա տոնավաճառների և պատարագների ժամանակ: Ազգային ոստիկանության ղեկավարը հայտնել է, որ տրանսպորտային միջոցներով իրականացվող ահաբեկչության ռիսկերի հետ կապված անհրաժեշտ է պատնեշներ կառուցել և տեսանկարահանում ապահովել, ինչպես նաև մուտքի մոտ անցորդների ստուգումներ իրականացնել: Դրա համար կներգրավվեն ոչ միայն ոստիկանության աշխատակիցներ, այլև մասնավոր անվտանգության ծառայություններ:
Ֆալկոնը նշել է, որ ոստիկանությունն ու հատուկ խմբերը անհրաժեշտության դեպքում պատրաստ կլինեն անմիջապես արձագանքելու ամանորյա պատարագների ժամանակ, որտեղ մեծ թվով մարդիկ են հավաքվում:
Երկուշաբթի երեկոյան, Բեռլինում, բեռնատարը մխրճվել է Ծննդյան տոների կապակցությամբ կազմակերպված տոնավաճառում հավաքված բազմության մեջ։ Զոհերի թիվը հասել է 12-ի, հիվանդանոց է տեղափոխվել 48 մարդ։ Գերմանիայի իշխանությունները հայտնել են, որ դա ահաբեկչություն է: Ռոյթերս գործակալության տվյալների համաձայն` կատարվածի համար պատասխանատվություն է ստանձնել ԻՊ ահաբեկչական խմբավորումը: Բեռլինի դեպքերին կասկածյալը` հետզխուզվող 24-ամյա թունիսցի Անիս Ամրին, սպանվել է Իտալիայում, ոստիկանության հետ փոխհրաձգության ժամանակ:
Նյութի ռուսերեն տարբերակը
