ԵՐԵՎԱՆ, 24 դեկտեմբերի — Sputnik. Հայաստանում տեղեկատվական տեխնոլոգիաներն արագ տեմպերով են զարգանում, իսկ սթարթափերն անում ամեն ինչ՝ համաշխարհային շուկան գրավելու համար, Sputnik Արմենիային տված հարցազրույցում ասաց տեղեկատվական անվտանգության փորձագետ Սամվել Մարտիրոսյանը:
IT-ն և տնտեսությունը
ՏՏ-ինդուստրիան հայկական տնտեսության մեջ սպեցիֆիկ ոլորտ է, քանի որ տեղեկատվական և հեռահաղորդակցման տեխնոլոգիաները դինամիկ կերպով զարգանում են ու կազմում հայրենական տնտեսության զգալի հատվածը, կարծում է Մարտիրոսյանը:
Նրա խոսքով` անկախ պարբերաբար առաջացած խնդիրներից, որոնք ի հայտ են եկել համաշխարհային ճգնաժամի արդյունքում, ՏՏ-ոլորտի ամենամյա աճը գնահատվում է 20-25%: Բացի այդ, ՏՏ ոլորտին է բաժին հասնում ՀՆԱ-ի 5-6 տոկոսը, իսկ սա բավականին լուրջ ցուցանիշ է:
«Վերջին երկու-երեք տարիների ընթացքում զգալի են որակական փոփոխությունները ՏՏ-ինդուստրիայում: 2000-ականների սկզբից մեզ մոտ գործում էին ընկերություններ, որոնք կատարում էին արտասահմանյան պատվերները: Հիմնականում դրանք ստեղծում էին ամերիկահայերը: Դա ուրիշների համար արվող աշխատանք էր: Սակայն վերջին տարիներին իրավիճակը սկսեց փոխվել, մի քանի բավական հաջող հայկական սթարթափեր համաշխարհային շուկա դուրս եկան», — նշեց մեդիափորձագետը:
Այսօր ակնհայտ է, որ ՏՏ-ինդուստրիան գնում է սեփական արտադրության զարգացման ճանապարհով, և այստեղ ամեն ինչ դեպի լավն է փոխվում»,-նկատեց փորձագետը:
Հայաստանի ձեռքբերումներն IT ոլորտում
Մարտիրոսյանը պատմեց նաև հայկական նախագծերի մասին, որոնք հաջողություն են գրանցել ոչ միայն երկրի ներսում, այլ նրա սահմաններից դուրս:
«Եթե խոսենք կոնկրետ նախագծերի մասին, որոնք դուրս են եկել համաշխարհային շուկա, և, ըստ էության, դարձել Հայաստանի սթարթափ-ինդուստրիայի համար դրայվերներ, ապա չի կարելի չնշել, օրինակ, PicsArt-ը, որն Instagram-ից հետո երկրորդ տեղում է: Զարգանում է նաև խաղային արտադրությունը, օրինակ, հայտնի Shadowmatic խաղը հանրաճանաչ է դարձել ամբողջ աշխարհում», — ասաց նա:
Փորձագետի խոսքով` Zangi հավելվածը նույնպես իր արժանի տեղն է զբաղեցնում համաշխարհային շուկայում: Մարտիրոսյանը կարծում է, որ մեզ մոտ լուրջ խաղացողներ են հայտնվել նաև սպասարկման ոլորտում: Այսպես օրինակ, Հայաստանում գործունեություն է ծավալել GG տաքսի ծառայությունը, որը ճանաչում է ձեռք բերում նաև հարևան հետխորհրդային երկրներում: Այլ կերպ ասած, ըստ փորձագետի՝ ՏՏ-ինդուստրիան ոչ միայն զարգանում է, այն փորձում է նաև նոր շուկաներ գրավել:
Նյութի ռուսերեն տարբերակը
