ԵՐԵՎԱՆ, 23 նոյեմբերի — Sputnik. «Մայքրոսոֆթի» հյուրերը ծանոթացան նորարարական կենտրոնի գործունեությանը և նոր կրթական ծրագրերին, որոնք խթան կհանդիսանան տեխնոլոգիաների զարգացման համար և երկրում կկրճատեն գործազրկությունը։
Sputnik Արմենիային տված բացառիկ հարցազրույցում ԱՊՀ երկրների հարցերով «Մայքրոսոֆթ» կորպորացիայի ԱՊՀ տարածաշրջանի գլխավոր ղեկավար Կոնստանտին Նազարովը պատասխանեց մի քանի հարցի։
-Պարոն Նազարով, ինչպե՞ս եք գնահատում Հայաստանի հաջողությունները ՏՏ ոլորտում։ Հայաստանը պահպանո՞ւմ է մրցունակությունը։
— Անշուշտ, պահպանում է։ «Microsoft ԱՊՀ»-ում 9 երկիր է ընդգրկված, բայց դրանցից երկուսն են առաջատար ՏՏ ոլորտի և ՏՏ հատվածի ընկերությունների զարգացման առումով ու առաջարկվող լուծումների քանակով։ Խոսքը Հայաստանի և Բելառուսի մասին է։
Իմ կարծիքով` դա խոսուն փաստ է։ Անկասկած, Հայաստանն ԱՊՀ երկրների շարքում առաջատար երկրներից է, որը կարող է իր ՏՏ լուծումներով իսկապես աշխատել ոչ միայն սեփական շուկայում, այլ նաև դուրս գալ և աշխատել տարածաշրջանային մակարդակում։
- Ըստ Ձեզ, ինտերնետն ինչպիսի՞ ապագա ունի։
Ապագայի ինտերնետը կլինի ամենուր։ Մենք հիմա արդեն տեսնում ենք այդ ապագան։ Մեզ շրջապատող գրեթե ցանկացած իր ինչ-որ կերպ կապված է այդ մարդկանց հետ կամ դա տեղի կունենա ապագայում հենց ինտերնետի օգնությամբ։
Դրանից ոչ մի տեղ չես փախչի։ Դա այն է, ինչ մենք անվանում ենք «առարկաների ինտերնետ»։ Կարծում եմ, խոսքը ոչ թե տասնյակ տարիների, այլ 2-4 տարվա մասին է։ Այդ ամենը շրջապատում է մեզ։
Ինտերնետը չի կլանում աշխարհը, բայց թափանցում է ամենուր։ Իմ կարծիքով` դա ունիվերսալ գործիք է, որն օգնում է մարդկանց և առարկաներին ավելի արդյունավետ դառնալ` փոխազդելով միմյանց հետ։
Microsoft կորպորացիան համագործակցում է Հայաստանի հետ 2007թ-ի հունվարի 30-ին Էդինբուրգում ստորագրված համաձայնագրի շրջանակում, որի համաձայն` Microsoft-ը Հայաստանում իրականացնում է մի շարք նորարարական, կրթական և ներդրումային ծրագրեր, որոնցից մեկն էլ Հայաստանում Microsoft-ի նորարարական կենտրոնի բացումն է։
