ԵՐԵՎԱՆ, 19 դեկտեմբերի — Sputnik, Գոռ Մարգարյան. Վերջին շաբաթվա ընթացքում տեղեկատվական տեխնոլոգիաների ոլորտը, ինչպես միշտ, ակտիվ է եղել, ու այդ ակտիվության «հեղինակների» շարքում են Facebook-ը, Apple-ը, Google-ն ու Instagram-ը: Մի նորություն էլ կներկայացնենք թռչող սարքերի աշխարհից:
Ֆեյսբուքյան նորություններ
Facebook-ն Ամանորին ընդառաջ միաժամանակ երկու լավ նորություն է պատրաստել: Առաջին նորությունն այն է, որ սոցցանցն այսուհետև սկսելու է ստուգել նորությունների հավաստիությունը: Տեղեկությունների ստուգման գործով զբաղվելու են անկախ կազմակերպությունները: Այս մասին Ցուկերբերգը հայտնել է իր ֆեյսբուքյան էջում:
Երկրորդ նորություն էլ վերաբերում է պատմությունների ինքնաոչնչացմանը: Սոցցանցերի ակտիվ օգտատերը գիտեն, որ սոցիալական ցանցերից մի քանիսն ինքնաոչնչացող պատմություններ տեղադրելու ֆունկցիա ունեն: Դրանց միջոցով կարող եք ձեր պատին տեղադրել նկարներ և տեսահոլովակներ, որոնք հանրությանը հասանելի կլինեն ընդամենը 24 ժամ, 1 օր հետո դրանք պարզապես կանհետանան անվերադարձ: Այս գործառույթով հայտնի են Instagram-ն ու Snapchat-ը: Կապույտ կայքի մասնագետները փորձում են իրենց զավակին հետ չթողնել նորաձևությունից, և որոշ փորձարկումներից հետո նրանք օգտատերերի դատին կհանձնեն My Day ֆունկցիան:
Նորություններ «խնձորականների» համար
Apple-ն անչափ կարևոր փոփոխություն է կատարել իր արտադրած սմարթֆոններում: Նոր iPhone-ը կունենա սիմ քարտի երկու անցք: Կրծած խնձորի հավատարիմ օգտատերերը վերջապես կազատվեն երկրորդ հեռախոս ունենալու անհրաժեշտությունից, ինչը մեր օրերում սովորական բան է, քանի որ ոչ բոլորը կարող են իրենց թույլ տալ մի օպերատորից մյուսին զանգել ու ուզածի չափ խոսել, հատկապես որ iPhone ունեցողների հիմնական մասն ամսական գումար է վճարում ապառիկով վերցրած սմարթֆոնի համար:
Իմիջիայլոց, մեկնարկել է նաև Apple-ի անլար ականջակալների վաճառքը, որոնք «ընդամենը» 159 դոլար արժեն, բայց առայժմ անհասկանալի է՝ բացի գնից, որն է դրանց առավելությունը: Նախ 5 անգամ թանկ են լարով ականջակալներից, երկրորդ՝ թրեքերի կառավարումը շատ է բարդացել. երբ նախկին ականջակալների դեպքում հնարավոր էր կոճակի միջոցով կանգնեցնել, շարունակել կամ էլ փոխել երաժշտությունը, հիմա երկար կարգավորումներ անելուց հետո այս գործողությունները պետք է անել ականջակալին թփթփացնելով, հետո հինգ ժամ օգտագործելուց հետո պետք է լիցքավորել ականջակալները, և վերջապես վերջին թերությունը՝ անլար ականջակալների զույգի մեկ հատը կորցնելուց հետո ստիպված պետք է նոր զույգ գնել:
Թռչող առաքիչը
Ոչ վաղ անցյալում ֆանտաստիկ թվացող երևույթներն այսօր իրականություն են դառնում. «Ամազոն» ընկերության հիմնադիր Ջեֆ Բեզոսը հայտնել է, որ իր կազմակերպությունն առաջին անգամ պատվեր է առաքել անօդաչու սարքի օգնությամբ։ Բնականաբար, նրանք դեռևս զիջում են մարդ-առաքիչներին, բայց այսօր կարելի է արդեն կանխատեսել, որ որոշ ժամանակ անց առաքումով զբաղվելու են դրոնները, իսկ առաքիչները նոր աշխատանք են փնտրելու: Կանխատեսումն անհիմն չէ, որովհետև դրոնն առաջին պատվերը գերազանց է կատարել․Ռիչարդ անունով հաճախորդի պատվիրած «Ամազոն Ֆայր ԹիՎի» հեռուստատեսային կցասարքն ու ադիբուդին առանց խնդիրների տեղ է հասցրել տասներեք րոպեում։
Ինստագրամյան նորություններ
Instagram-ը բավական հայտնի և սիրված ծառայություն է հայերի համար, մասնավորապես՝ թիթիզահայուհիների։ Այս սոցցանցի հանրաճանաչությունը հետզհետե մեծանում է, և ակտիվ օգտատետերի քանակն արդեն հատել է 600 միլիոնի սահմանը։
Գուգլի հեքիաթն ու իրականությունը
Գուգլի նախկին աշխատակիցներից ութը հայտարարել են, որ Գուգլը վառ գունավորված աշխարհ չէ, ինչպես պատկերացնում են մարդիկ։ Նրանք ասում են, որ ընկերությունում աշխատելիս՝ դու դառնում ես գուգլյան գերի և շուրջբոլորդ միայն գուգլ է. ուտելիքը գուգլ է, ընկերներդ գուգլից են, հեռախոսդ գուգլինն է, և անվերջ կարելի է շարունակել այս շարքը:
Հայտնի չէ՝ այս հայտարարությունները որքանով են իրական, սակայն Գուգլին վերաբերող մյուս լուրը հաստատ իրականության շարքից է. գուգլցիները ռիսկ չեն անում ինքնակառավարվող մեքենաներ արտադրել սեփական ուժերով: Փոխարենը նրանք պատրաստ են համագործակցել այլ ավտոարտադրողների հետ։ Ենթադրվում է, որ Գուգլի առաջին գործընկերը կլինի Fiat Chrysler-ը, և նրանք համատեղ ուժերով կստեղծեն ինքնակառավարվող ավտոմեքենաներ Գուգլի համար, և եթե ամեն ինչ ընթանա ըստ ծրագրածի, ապա 2017-ին Գուգլի աշխատակիցներին շուրջ հարյուր ինքնակառավարվող ավտոմեքենա կսպասարկի։
