ԵՐԵՎԱՆ, 12 դեկտեմբերի — Sputnik, Գոռ Մարգարյան. Անցած շաբաթվա ամենակարևոր նորությունների ցանկում տեղ գտած լուրերը կհետաքրքրեն սելֆիամոլներին, ռոբոտների ու նորարար սարքերի սիրահարներին, գումար աշխատելու ցանկություն ունեցողներին, ինչպես նաև՝ ֆիլմասերներին:
Հատուկ սելֆիամոլների համար
21-րդ դարի ամենասիրելի զբաղմունքներից մեկը՝ սելֆին, տարեկան տասնյակ մարդկանց մահվան պատճառ է դառնում: Գեղեցիկ տեսարաններից ոգևորված երիտասարդները հաճախ մոռանում են անվտանգության մասին ու դժբախտ պատահարի զոհ դառնում: Սակայն նոր տեխնոլոգիաները ստեղծվում են մարդուն սեփական հիմարությունից պաշտպանելու համար: Սելֆիամոլներն արդեն կարող են ինքնալուսանկարվել վտանգավոր վայրերում և չմտածել իրենց անվտանգության մասին, որովհետև ստեղծվել է AirSelfie գաջեթը:
Դեռևս նախատիպային վիճակում գտնվող այս փոքրիկի քաշը 50 գրամ է, հեշտությամբ տեղավորվում է գրպանում ու սպասում մինչև իրեն օդում սավառնելու հրաման տրվի, որպեսզի օդում ճախրելով նկարի այն, ինչ տեսնում է: Մասնագետները խոստանում են, որ այս դրոնի ֆոտոները սովորական սելֆիներից չեն տարբերվի իրենց որակով և գուցե մի բան էլ ավելի լավը լինեն:
Քանի դեռ այն մասսայական վաճառքի չի հանվել, թռչող սարքն առայժմ 180 եվրո արժե, իսկ շուկայում հայտնվելուց հետո գինը կբարձրանա հարյուր եվրոյով: Երևի ժամանակն է, որ Արտակարգ իրավիճակների բոլոր նախարարությունները բարձր կամուրջների վրա զբոսնողներին այս սարքի մեկական օրինակ նվիրեն և փակեն անզգուշության ու, ինչու ոչ, նաև հիմարության զոհ դարձածների թեման:
Գումար՝ կարծիքի դիմաց
Մի լավ նորություն՝ ֆեյսբուքցիների համար: Բոլոր նրանք, ովքեր սիրում են այս կամ այն կազմակերպության մասին իրենց կարծիքն արտահայտել ֆեյսբուքյան գրառումների միջոցով, այսուհետև կարող են փող աշխատել գրառման դիմաց: Հայ մասնագետները ստեղծել են SocialBridge հարթակը, որն առաջարկում է ֆեյսբուքյան հաշվի միջոցով մուտք գործել համակարգ և կարծիք հայտնել SocialBridge-ի հետ համագործակցող որևէ կազմակերպության մասին: Հետո SocialBridge-ը օգտատիրոջ հաշվին կփոխանցի 5-25 դրամ՝ հաշվի առնելով գրառման հավաքած լայքերի, մեկնաբանությունների և տարածողների քանակը:
Հաշվին 500 դրամ կուտակելուց հետո կարելի է կանխիկացնել այն: Այս լուրը, թերևս, կհետաքրքի բոլոր նրանց, ովքեր սիրում են ֆեյսբուքում հրապարակել իրենց օրվա կերակուրների նկարներն ու լայքել սեփական գրառումները: SocialBridge-ը նրանց ժամանակը ռացիոնալ օգտագործելու և գումար վաստակելու հնարավորություն է տալիս:
Խելացի հովանոցն ու էմոցիաներ կառավարող սարքը
Մեր կյանքն օրեցօր հեշտանում է նորագույն սարքերի և ռոբոտների շնորհիվ, ու մեր օրերում ստեղծված երկու գաջեթներից մեկը մեզ չի թողնի թրջվել ֆիզիկապես, իսկ մյուսը՝ հոգեպես:
Խելացի հովանոցը տնից դուրս գալիս մեզ կզգուշացնի վատ եղանակի մասին: Պետք է ցնցել դրա բռնակը և համապատասխան գույնը կհուշի՝ ինչ եղանակ է դրսում: Այն նաև տեղեկացնում է բաց թողած զանգերի և հաղորդագրությունների մասին: Իսկ եթե օգտատերը սմարթֆոնը մոռանա կամ դրանից շատ հեռանա, «խելացի» հովանոցն այդ մասին կհայտնի բռնակի թրթռոցով: Սարքի մարտկոցը կբավականացնի գրեթե 1 տարի:
Հաջորդ նորարարության անհրաժեշտությունը կզգան միայնակ ու գերզբաղված մարդիկ: Հատուկ նրանց համար կանադացի գիտնականները ստեղծել են մի գաջեթ, որը կկառավարի էմոցիաները: Սարքը կազմված է ցուցիչներով ժապավենից, որոնք ամրացվում են օգտատիրոջ գլխին, տվյալներ են հավաքում ուղեղի լարվածության մասին և փոխանցում սմարթֆոնին: Չափազանց լարվածության դեպքում սարքը կարող է թուլացնող ազդակներ ուղարկել և հանգստացնել իր տիրոջը:
Հարցվածների 80%-ը նշել են, որ սարքն օգտագործելուց հետո իրենց ինքնազգացողությունը բարելավվել է:
Նոր ֆիլմերը դիտելու հնարավորություն
Apple-ը կարծես թե հնարավոր է դարձնում կինոմանների վաղեմի երազանքը. Այսինքն՝ վարձույթ հանված նոր ֆիլմերը դիտել պրեմիերաներից անմիջապես հետո: Այս պահին ամերիկյան խնձորի գործակալները բանակցում են հոլիվուդյան ստուդիաների հետ: Որոշ ստուդիաներ արդեն հայտնել են, որ իրենց դուր է եկել Apple-ի առաջարկով և կուզենային, որ իրենց ֆիլմերը կինոթատրոններում կայացած պրեմիերաներից հետո 2 շաբաթվա ընթացքում հասանելի լինեին օնլայն հարթակում:
Եթե ամեն ինչ հաջողվի, ապա iTunes-ը բավական մեծ առավելություն կստանա իր մրցակիցների նկատմամբ և ըստ իս միանձնյա կգլխավորի առաջատարների ցուցակը: Սպասում եմ նաև մրցակիցների արձագանքին: Ամենայն հավանականությամբ մրցակցային կանոնների խախտման համար Apple-ը գոնե Եվրոպայում կպարտվի հերթական դատական գործընթացը և հերթական անգամ խոշոր տուգանք կվճարի:
Նացումե Սոսեկիի ռոբոտ-նմանակը
Այս շաբաթ հանրությանը ներկայացվեց ճապոնական ժամանակակից գրականության հիմնադիրներիներից մեկի՝ Նացումե Սոսեկիի ռոբոտ-նմանակը: Իսկ ի՞նչ կկարողանա անել նմանակ ռոբոտը: Դե իհարկե կկարողանա նմանակել: Հենց այդ գործով էլ զբաղվել է նա հրապարակային հանդիպման ժամանակ, երբ հավաքված մարդկանց ասել է. «Ընկերներ վաղուց չենք հանդիպել: Շուրջ 100 տարի է անցել հավանաբար»:
Հետաքրքիր կլիներ, եթե հայաստանցի ռոբոտաշինարարները ոգևորվեին այս ռոբոտի գաղափարից ու մե՛ր հանճարի ռոբոտ-նմանակին ստեղծեին: Ապագա ռոբոտի արտաքինն էլ նման լիներ մեր 1000 դրամանոցի վրա պատկերված նկարին ու կարդար Չարենցի ստեղծագործությունները:
Կարծում եմ՝ գաղափարը վատը չէ, գուցե իրագործե՞նք, մանավանդ որ ժամանակ էլ ունենք. Չարենցի մահվան 100-րդ տարելիցին մոտ 20 տարի դեռ կա:
